काठमाण्डु – सञ्चार तथा सूचना प्रविधिमन्त्री जगदीश खरेलले तोकिएकै मितिमा निष्पक्ष र धाँधलीरहित निर्वाचन हुने बताएका छन् ।

शनिबार ललितपुरको पाटनमा आयोजित निर्वाचन २०८२ लक्षित गल्ली एप उद्घाटन कार्यक्रममा बोल्दै उनले अब युवा पुस्ता राजनीतिमा अगाडि आएको बताउँदै मुलुक परिवर्तनको बाटोमा अघि बढिरहेको बताए ।

उनले भने, ‘देशमा चुनाव फागुन २१ गते हुँदैछ । यो चुनावमा यहाँहरू सबैलाई म आग्रह गर्न चाहन्छु । कृपया यसपटक हामीले गल्ती नगरौं । राम्रो नेता र राम्रो नेतृत्व हामीले ल्याउन जरुरी छ । अब मुलुक परिवर्तनको बाटोमा अघि बढ्दैछ । अब युवा पुस्ता राजनीतिमा अगाडि आउँदैछ र देशको अनुहार बदलिँदै छ । यो बद्लिने कुरामा यहाँहरू सबैको साथको अपेक्षा सरकारले राखेको छ र यो सरकार समयमै चुनाव गराउने कुराहरूमा निष्पक्ष निर्वाचन गराउने कुरामा, धाँधलीरहित निर्वाचन गराउने कुरामा प्रतिबद्ध छ ।’

उनले जेनजीको आन्दोलन सफल भएर पनि आफूले सत्ताको माग नगरेको भन्दै उनीहरूको माग सुशासनको मात्र रहेको बताए । जेनजीहरूले मागेको सुशासनलाई आफूहरूले पछ्याउने कोशिस गरिरहेको बताउँदै मन्त्री खरेलले जेनजी आन्दोलनमा बगेको रगत खेर जान नदिने अठोट गरेका छन् ।

‘जेनजीको आन्दोलन सफल भयो । जेनजीले हामीलाई सरकारमा पठायो । उ सरकारमा गएन । सत्ता मागेन र हामीलाई फेरी भन्यो सुशासन देऊ । हामी अहिले त्यो पछ्याउने कोशिस गरिरहेको छौं । जुन निस्वार्थ रगत जेनजी आन्दोलनमा बगाएको छन्, त्यो खेर जान दिनुहुँदैन,’ उनले भने ।

मन्त्री खरेलले फागुन २१ गते निर्वाचन हुन्छ कि हुँदैन भन्ने द्विविधा अब हटेको दाबी गरेका छन् ।