काठमाण्डु– नेपाली कम्युनिस्ट पार्टी (नेकपा) का वरिष्ठ नेता एवं पूर्वप्रधानमन्त्री झलनाथ खनालले वामपन्थी एकता आवश्यक रहेको बताएका छन् ।

आइतबार मदन भण्डारी फाउन्डेसनले आयोजना गरेको विचार गोष्ठी कार्यक्रममा उनले  वामपन्थी एकता अहिलेको परिस्थितिमा अत्यन्तै आवश्यकता रहेको बताएका हुन् । 

खनालका अनुसार समयले कम्युनिस्टहरूलाई हिर्काएको र अहिले बाध्यात्मक परिस्थिति खडा भएको छ ।  

‘कतिपयलाई आश्चर्य लागेको हुनसक्छ , अनौठो लागेको हुनसक्छ । वामपन्थी एकता आजमात्रै होइन, अनेकन कालखण्डबाट आवश्यक थियो,’ उनले भने, ‘तर, बीचको कालखण्डमा हामीहरूमा कहिले सिङ पलायो, कहिले जुरो पलायो । त्यसकारण हामी एक हुन सकेनौं । अब समयले हामीलाई हिर्काउन थालेको छ । बाध्यात्मक परिस्थितिमा खडा गर्न थालेको छ । यसले गर्दा आज हामी वामपन्थी फेरि एकताबद्ध हुन खोज्दैछौं ।’

यस्तै उनले बामपन्थीहरू कमसेकम विचार गोष्टीमा भएपनि एकबद्ध भएकोमा खुशी प्रकट गरे । 

‘अब यही दिनबाट वामपन्थी एकतालाई दीर्घकालीन रुपमा अगाडि बनाउन थालौं,’ खनालले भने, ‘तबमात्रै आज हाम्रो देशमाथि जुन साम्राज्यवादीले बबण्डर मच्चाइरहेका छन्, यसका विरुद्ध लडाईं तबमात्रै गतिशील भएर अघि बढ्न सक्छ ।’