काठमाण्डु – नेकपा एमालेका नवनिर्वाचित अध्यक्ष केपी शर्मा ओलीले प्रतिनिधिसभा पुन:स्थापनाका लागि देशव्यापी आन्दोलन गर्ने उद्घोष गरेका छन् ।

तेस्रो कार्यकालका लागि अध्यक्ष पदको शपथग्रहण गरेलगत्तै सम्बोधन गर्दै ओलीले सँगसँगै अदालतमा कानूनी लडाइँ साथमै लिएर जाने बताए ।

असंवैधानिक ढंगले देशमा आगजनी र लुटपाट मच्चाएर गरिएको संसद् विघटन र सरकार गठन स्वीकार नहुने उनले बताए । भदौ २४ गतेको घटनापछि देशमा पुराना पार्टीहरू सकिए भन्नेलाई एमालेले जवाफ दिएको र अझ दिने उनले बताए ।

अध्यक्ष ओलीले एमाले अजम्बरी पार्टी भएको भन्दै अब सबैलाई एकताबद्ध बनाएर अझ बलका साथ अघि बढ्ने बताए ।