काठमाण्डु – प्रधानमन्त्री केपी शर्मा ओलीले सरकारले प्रतिनिधिसभा विघटन गर्नुको औचित्य पुष्टि हुँदै गएको बताएका छन् ।

बालुवाटारमा नेकपा एमालेले आयोजना गरेको चियापान कार्यक्रममा बोल्दै प्रधानमन्त्री ओलीले संसद् विघाटनको औचित्य पुष्टी हुँदै गएको बताएका हुन् ।

उनले संसद्लाई जनताका मागहरू सम्बोधन गर्ने थलो बनाउन प्रयासरत रहेपनि संसद्लाई सभामुखले त्यसरी चल्न नदिएको बताए ।

‘कामै गर्न नदिएपछि सरकारले संसद् विघटन गरेको थियो । पछि सर्वोच्चले त्यो बदर गरिदियो । त्यसपछि पार्टीलाई पनि पुरानै ढंगबाट फर्काइदियो,’ उनले भने, ‘संसद् बैठक बसेर विधेयकहरू पेश गरिएको थियो । तर सुरूको दिन नै अवरोध गरियो । सभामुखले नै अवरोध गरे । एसिड आक्रमणविरुद्धको अध्यायदेश पेश गरिएको थियो । त्यो पनि पेश हुन दिइएन्, संसद विघटन गर्नुको कारण पुष्टि हुँदैछ ।’

त्यस्तै उनले वरिष्ठ नेता झलनाथ खनाल र माधवकुमार नेपाल पक्ष चियापनमा उपस्थित नभएकोप्रति असन्तुष्टि प्रकट गरे ।

उनले कसको निम्ता पाए जानुहुन्छ ? भन्दै प्रश्न पनि गरे । झलनाथ–माधव पक्षले आजको चियापनामा नजाने निर्णय सोमबार नै गरेको थियो । ‘एकथरीका अनुहारहरु देखिएन । त्यो राम्रो भएन,’ प्रधानमन्त्री ओलीले भने ।