कृषि विकास बैंकको सिस्टम ह्याक गरी रकम हिनामिना गर्ने फरार अभियुक्त पक्राउ
काठमाडौं – कृषि विकास बैंकको सिस्टम ह्याक गरी रकम ठगी गरेको अभियोगमा फरार रहेका एक जना पक्राउ परेका छन् ।
शनिबार साढे पाँच बजे महानगरीय अपराध महाशाखा, टेकूले धादिङ रुबिभ्याली गाउँपालिका–२ का ३६ वर्षीय सौजन तामाङलाई ललितपुरस्थित जावलाखेलबाट पक्राउ गरेको हो । तामाङ हाल तार्केश्वर नगरपालिका–५ बस्दै आएका छन् ।
पक्राउ परेका तामाङलाई संगठित अपराध समेतका कसूरमा आवश्यक कारवाहीको लागि जिल्ला अदालत काठमाडौंमा पठाइएको महानगरीय अपराध महाशाखा टेकुले जनाएको छ ।
बैंकको मुख्य कार्यालय र शाखा कार्यालय न्यूरोडको वित्तीय प्रणाली ह्याक गरी विभिन्न व्यक्तिहरुको खातामा रकमान्तर गरी तामाङसहितको समूहले भुक्तानी लिएका थिए ।
यसरी रकमान्तर गरी बैंकलाई हानी पु¥याएको अभियोगमा यसअघि २१ जनालाई पक्राउ गरी कारबाही गरिसकेको अपराध महाशाखाका एसपी इश्वर कार्कीले बताए ।
प्रणाली ह्याक गरी विभिन्न व्यक्तिका नाममा रकमान्तर गर्ने तीन जनालाई प्रहरीले गत असोजमा पक्राउ गरेको थियो । यसअघि पक्राउ पर्नेमा श्रवन कुमार श्रेष्ठ, सुनिता श्रेष्ठ र शुभशंकर पन्जा छन् ।
गत असोज ७ गते न्यूरोड शाखाबाट सुनिता श्रेष्ठको खातामा जम्मा ४९ लाख ५० हजार रकमान्तर भएकोमा ९ लाख ५० हजार भुक्तानी भएको थियो । बाँकी रकममध्ये श्रवन कुमार श्रेष्ठको खातामा रकमान्तर गर्न २० लाखको चेक पेश भएको थियो ।
यसमै शंका लागेर सिस्टम चेक गर्दा एउटा समूहले बैंकको मौज्दातबाट विभिन्न मितिमा सिस्टम ह्याक गरी ४ करोड ८८ लाख ४६ हजार रकमान्तर गरी भुक्तानी लिएको खुलेको थियो ।
