काठमाण्डु– नेपाली कांग्रेसका नेता कृष्णप्रसाद सिटौलाले विशेष महाधिवेशनको औचित्य नभएको बताएका छन्।

सोमबार काठमाण्डुमा आयोजित पत्रकार सम्मेलनमा बोल्दै नेता सिटौलाले विशेष महाधिवेशनको औचित्य सकिएको बताएका हुन् ।

उनले भने ‘अब विशेष महाधिवशेनको औचित्य छैन,पर्सि विशेष महाधिवेशन हुँदैन। ‘जबसम्म क्रियाशील सदस्यता टुंगिँदैन, तबसम्म महाधिवेशनको कार्यक्रम अघि बढ्दैन ।

यस्तै सिटौलाले प्रतिनिधि सभाको निर्वाचनमा कांग्रेस एक्लै चुनावमा जाने बताए ।

‘प्रतिनिधि सभाको चुनावमा हामी एक्लै जाने हो,’ सिटौलाले भने, ‘अहिलेसम्म एक्लै चुनावमा जानुपर्छ भन्ने छ। पार्टीको बटम लाइन त्यही हो। प्रष्ट दृष्टिकोण र विचार सहित चुनावमा जानुपर्छ,’ सिटौलाले भने, ‘अहिलेसम्म प्रतिनिधि सभाको चुनावमा एक्लै जाने भन्नेछ।’

राष्ट्रियसभा निर्वाचनबारे कांग्रेसले अन्य पार्टीहरूसँग छलफल गरिरहेको पनि उनले बताए ।

उनले भने ‘कुन कुन पार्टीसँग गठबन्धन हुने, क्लष्टर के हुने भन्नेमा आज टुंगो लाग्छ । आजको कार्यसम्पादन समितिमा छलफल हुन्छ । एक्लै लड्दा परिणाम नआउने भएकाले राष्ट्रियसभामा गठबन्धन गर्ने कुरा भएको हो । राष्ट्रियसभामा प्रतिनिधित्व गर्ने सबै दलहरूसँग साझा सहकार्य गर्न उपयुक्त हुन्छ । सबै दलहरूबीच तालमेल हुनु उपयुक्त हुन्छ भन्ने हो ।’