काठमाण्डु – लुम्बिनी प्रदेशमा आइतबार मन्त्रिपरिषद्ले पूर्णता पाउने भएको छ । गठबन्धन दलहरूले मन्त्रीको नाम टुंग्याएपछि आज मन्त्रिपरिषद्ले पूर्णता पाउन लागेको हो । आजै सपथ ग्रहण कार्यक्रम राखिएको मुख्यमन्त्रीका प्रेस सल्लाहकार मानसिंह विकले बताए ।
नेपाली कांग्रेसले वन, वातावरण तथा भूसंरक्षणमा सुरेन्द्र हमाल, शिक्षा विज्ञान युवा तथा खेलकुदमा वसिउद्दिन खाँ र ऊर्जा, जलस्रोत तथा सिँचाइमा वीरबहादुर रानालाई मन्त्री बनाउने सहमति जुटेको छ ।
राज्यमन्त्रीमा कपिलवस्तुकी रिना नेपाल बिक र अर्जुनकुमार श्रेष्ठलाई पठाउने निर्णय भएको काँग्रेसका प्रमुख सचेतक फखरुद्दिन खानले बताए । यसअघि साउन २८ गते कांग्रेसबाट दाङका डिल्लीबहादुर चौधरी पर्यटन, ग्रामीण तथा शहरी विकास मन्त्री भइसकेका छन् ।
माओवादी केन्द्रबाट दाङका इन्द्रजित थारु र बर्दियाका तिलकराम शर्मा मन्त्री बन्ने भएका छन् भने सोही पार्टीबाट दाङकी विमला खत्री वली राज्यमन्त्री बन्ने भएकी छन् । यसअघि माओवादीबाट प्युठानका कृष्णध्वज खड्का आर्थिक मामिला तथा सहकारी मन्त्री बनिसकेका छन् ।
माओवादीले योपटक आन्तरिक मामिला तथा सञ्चार, कानुन, महिला बालबालिका तथा जेष्ठ नागरिक र स्वास्थ्य, जनसंख्या तथा परिवार कल्याण मन्त्रालय पाएको छ ।
माओवादीले पाएको मन्त्रालयमा नेकपा एकीकृत समाजवादीबाट रमा घर्ती मन्त्री बन्ने माओवादी प्रमुख सचेतक तुलाराम घर्तीले जानकारी दिए । रमा लुम्बिनीमा नेकपा एकीकृतको तर्फबाट एकमात्र सांसद हुन् ।
साउन २८ गते गठबन्धन सरकार बनेपनि दलहरूबीच मन्त्रालयको भागबण्डामा सहमति नजुटेपछि मन्त्रिपरिषद् विस्तारमा ढिलाई भएको थियो ।
प्रतिक्रिया