काठमाण्डु– अमेरिकी विदेश मन्त्रालयले मध्यपूर्वमा रहेका आफ्ना नागरिकलाई तुरुन्तै ती देशहरु छोड्न आग्रह गरेको छ।

तनाव बढ्दै जाँदा गम्भीर सुरक्षा जोखिम रहेको भन्दै व्यावसायिक उडान प्रयोग गरेर ती देशबाट सकेसम्म चाँडो बाहिरिन भनेको हो।

बहराइन, इजिप्ट, इरान, इराक, इजरायल, वेस्ट बैंक, गाजा, जोर्डन, कुवेत, लेबनन, ओमान, कतार, साउदी अरेबिया, सिरिया, संयुक्त अरब इमिरेट्स र यमनमा रहेका अमेरिकीलाई तत्काल त्यहाँबाट निस्किन भनिएको हो।

अमेरिकी विदेशमन्त्री मार्को रुवियोले सामाजिक सञ्जाल एक्समार्फत भिडियो सन्देश जारी गर्दै मध्यपूर्वमा रहेका अमेरिकी नागरिकको सुरक्षा पहिलो प्राथमिकता भएको उल्लेख गरेका छन् । उनले नागरिकहरूलाई स्टेप प्रणालीमा दर्ता गर्न, ट्राभल एडभाइजरी हेर्न तथा आवश्यक परे २४ सै घण्टा उपलब्ध आपतकालीन नम्बरमा सम्पर्क गर्न आग्रह गरेका छन् ।

इजरायल र अमेरिकाले शनिबार इरानमा आक्रमण गरी त्यहाँका सर्वोच्च नेतासहित शीर्ष नेता तथा अधिकारीको हत्या गरेपछि इरानले पनि उनीहरूविरुद्ध जवाफी हमला गरिरहेको छ।

इरानले सोमबार साउदी अरबको रियादस्थित अमेरिकी दूतावासमा ड्रोन आक्रमण गरेको छ ।

यस्तैमा लेबननको बेरुतमा इजरायलले आक्रमण तीव्र पारेको छ। इजरायली सेनाले हेजबुल्लाहसँग सम्बद्ध स्थानीय च्यानल अल–मनार टीभी स्टेसन रहेको भवनमा हमला गरेको छ।

लेबननी स्वास्थ्य मन्त्रालयका अनुसार हमलामा अहिलेसम्म कम्तीमा ५२ जनाको मृत्यु भएको छ भने १५४ जना घाइते भएका छन्।

यसैबीच, संयुक्त राज्य अमेरीकाको केन्द्रिय कमान्ड (सेन्टकम) ले मध्यपूर्वमा जारी द्वन्द्वका क्रममा ६ जना अमेरिकी सैनिक मारिएको पुष्टि गरेको छ । सेन्टकमका अनुसार इरानको प्रारम्भिक आक्रमणमा प्रभावित एक सैन्य संरचनाबाट बेपत्ता दुई सैनिकको शव हालै फेला पारिएको हो । मृतकहरूको पहिचान आफन्तलाई जानकारी गराएपछि मात्रै सार्वजनिक गरिने बताइएको छ ।