काठमाण्डु – नेकपा एमालेका नेता महेश बस्नेतले देशको हरेक चरणमा नेकपा एमाले र अध्यक्ष केपी शर्मा ओलीको जनताले स्मरण गर्न थालेको दाबी गरेका छन् ।

सोमबार काठमाण्डुमा आयोजित राष्ट्रिय युवासंघ नेपालको बागमती प्रदेशस्तरीय युवा जागरण भेला कार्यक्रमलाई सम्बोधन गर्दै उनले केपी ओलीले बनाइदिएको क्रिकेट रंगशाला, सामाजिक सञ्जालमा आफूलाई हिरोको रूपमा प्रस्तुत गर्ने कुलमान घिसिङले आईतबार उद्घाटन गरेकोमा क्रिकेट संघका अध्यक्षदेखि पारस खड्कासम्मले व्यंग्यात्मक वक्तव्य दिएको भन्दै हरेक स्टेपमा एमाले र अध्यक्ष केपी शर्मा ओलीको याद आउन थालेको दाबी गरेका हुन् ।

उनले भने, ‘केपी ओलीले पहिलो निर्णय नै क्रिकेट मैदानको विकासलाई तीव्र रूपमा अगाडि बढाउने थियो । ढिला गरी भए पनि काम भयो । केपी ओलीले बनाइदिएको क्रिकेट रंगशाला र सामाजिक सञ्जालमा आफूलाई हिरोको रूपमा प्रस्तुत गर्ने कुलमान घिसिङले हिजो जुंगा मुसार्दै उद्घाटन गरे । क्रिकेट संघका अध्यक्षदेखि पारस खड्कासम्मले उद्घाटनलाई व्यंग्यात्मक ढंगले वक्तव्य दिनुभयो । त्यसैले हरेक स्टेपमा एमाले र केपी ओलीको पटक–पटक याद आउँदैछ ।’

जेनजी आन्दोलन, आन्दोलन नभएर विदेशीबाट सञ्चालित मुलुकप्रतिको आक्रमण भएको उनले बताए । सुधन गुरुङको हामी नेपाल फाउन्डेसन जस्ता संस्थामार्फत आक्रमणको लागि ५०–६० अर्ब लगानी गरिएको उनको आरोप छ ।

बालेन साह र सुधन गुरुङलाई विदेशीले खडा गरेको एजेण्डहरू भन्दै उनले आरोप लगाए । ‘जेनजी पुस्तालाई उचालेर नेपालमा विद्रोह गराइयो । आन्दोलन भनिन्छ, त्यो पनि आन्दोलन थिएन । त्यो मुलुकप्रति आक्रमण थियो । त्यो आक्रमणमा विदेशी शक्तिहरूले धेरै लगानी गरेको पनि थिएन । हामी नेपाल जस्ता संस्थामार्फत ५०–६० अर्ब लगानी गरेका थिए होला । बालेन र सुधन जस्ता विदेशी एजेण्डहरू यहाँ खडा गरिएको थियो ।’