काठमाण्डु– नेकपा माओवादी केन्द्रले आज पार्टी पदाधिकारीसहित केन्द्रीय सदस्यहरुको नाम हलबाटै घोषणा गर्ने भएको छ । माओवादी केन्द्रको जारी महाधिवेशनमा शनिवार बन्दसत्र स्थगित गरेर निर्वाचन कार्यतालिका संशोधन भएको थियो ।

माओवादी अध्यक्ष पुष्पकमल दाहालले आज पदाधिकारीसहित २९९ सदस्यीय केन्द्रीय कमिटी महाधिवेशन हलबाटै घोषणा गर्ने तयारी गरेका छन् । त्यसका लागी उनले पार्टीभित्रका प्रभावशाली नेताहरुसंगको छलफललाई जारी राखेका छन् । उनले आज १ बजे नेतृत्वको घोषणा गर्दैछन् ।

माओवादीमा अध्यक्षमा दाहाल नै दोहोरिने निश्चित भएको छ । वरिष्ठ उपाध्याक्षमा नारायणकाजी श्रेष्ठ,उपाध्यक्षहरु कृष्णबहादुर महरा,देव गुरुङ,पम्फा भुषाल,वर्षमान पुन,हरिबोल गजुरेल र मातृका यादव, महासचिवमा शक्ति वस्नेत, उपमहासचिवमा गिरिाजमणी पोखरेल र जनार्दन शर्मा र सचिवमा देवेन्द्र पौडेल, चक्रपाणी खनाल र राम कार्कीको नाम प्रस्ताव हुने तयारी छ । कोषाध्यमा देवेन्द्र पौडेलको सम्भावना बलियो छ ।

माओवादीमा मुख्यगरी महासचिवमा जनार्दन शर्मा र वर्षमान पुनको लडाई थियो । अन्तिममा नेता बस्नेतले पनि महासचिवमा दावी गरेका थिए । पुन र शर्माको गुटबन्दी चर्को भएको भन्दै पार्टीलाई मजबुत बनाउन तेस्रो विकल्पमा जान अध्यक्ष दाहाललाई नेताहरुले सुझाव दिएका थिए ।

माओवादी नेताहरु कृष्णबहादुर महरा, हरिबोल गजुरेल, सभामुख अग्नी सापकोटा, राम कार्की,चक्रपाणी खनाल,हितराज पाण्डे,देवेन्द्र पौडेललगायतले बस्नेतलाई महासचिव बनाउन अध्यक्ष दाहाललाई सुझाव दिएको स्रोत बताउंछ । महासचिवको प्रतिस्पर्धामा रहेका नेता पुनले समेत बस्नेतलाई समर्थन गर्ने बताए पनि शर्मालाई भने मनाउने प्रयास जारी छ ।

माओवादीमा केन्द्रीय कमिटीका लागि भूगोल सात र एक विशेष प्रदेश गरी आठवटै प्रदेशबाट केन्द्रीय कमिटी सदस्यका लागि क्लस्टर अनुसारका नाम सिफारिस भैसकेका छन् । आज ११ बजे बस्ने स्थायी समिति बैठकले पदाधिकारीमा सहमति गरेर खुलातर्फ १४५ र समानुपातिकातर्फ सबै क्लस्टर मिलाएर १५४ जनाको नाम टुंगो लगाएर हलमा केन्द्रीय समिति र पदाधिकारी घोषणा हुनेछ ।

यो पनि पढ्नुहोस-

माओवादी महासचिवमा जनार्दन र वर्षमानको लडाइँले ‘गुट भत्काउन’ प्रचण्डको रोजाइमा तेस्रो नेता