काठमाण्डु – माओवादी केन्द्र्रको राष्ट्रिय सम्मेलनमा १६ सय ३१ जना प्रनिनिधि सहभागी हुने भएका छन् । शुक्रबार बसेको माओवादी केन्द्रको स्थायी कमिटी बैठकले सम्मेलनमा प्रदेश, विभिन्न संगठन र मनोनित गरि १६ सय ३१ जना प्रतिनिधि सहभागी हुने निर्णय गरेको प्रवक्ता कृष्णबहादुर महराले बताए ।

शुक्रबार बसेको स्थायि समिति बैठकमा अध्यक्ष पुष्पकमल दाहालले आफ्नो राजनीतिक प्रतिवेदन पेश गरेका छन् । बैठकले १० प्रतिशत अर्थात १ सय ४८ जना मनोनित गर्ने अधिकार समेत अध्यक्ष दाहाललाई दिएको छ ।

स्थायी समिति बैठक भोलि १ बजे फेरि बस्ने कार्यसूची रहेको प्रवक्ता महराले बताए । शनिवार बैठकमा अध्यक्ष दाहालको राजनीतिक दस्तावेजमाथि छलफल हुनेछ । नेकपा माओवादीको पुस ११ १३ सम्म काठमाण्डुमा चल्ने राष्ट्रिय सम्मेलनमा नयां नेतृत्व समेत चयन हुनेछ ।

अध्यक्षमा दाहाल नै दोहोरिने निश्चित भएपनि महासचिव र अन्य पदमा भने धेरै आकांक्षीहरु देखिएका छन् । माओवादीमा पदाधिकारीको संख्या बढाउने प्रस्ताव समेत आएको छ। माओवादी केन्द्रको विधानमा ५ जना मात्रै पदाधिकारी रहने व्यवस्था छ । यसलाई बढाएर १५ सदस्यीय बनाउने प्रस्ताव आएको एक स्थायी समिति सदस्यले बताए ।

माओवादीमा यो प्रस्ताव पास भए वरिष्ठ सहित ७ जना उपाध्यक्ष, ३ जना सचिव, १ जना महासचिव, १ जना उपमहासचिव र १ जना कोषाअध्यक्ष हुनेछ ।

माओवादीमा महासचिवका लागी नेताहरु वर्षमान पुन,शक्ति वस्नेत,पम्फा भुसाल र जनार्दन शर्माबीच मुख्य प्रतिस्पर्धा छ । त्यसैगरी वरिष्ठ उपाध्यक्षमा नारायणकाजी श्रेष्ठको सम्भावना छ । महासचिवका लागी शर्मालाई महरा र भुसालले समेत समर्थन गर्न सक्ने चर्चा छ ।