काठमाण्डु – लेखक नारायण वाग्लेले पुष्पकमल दाहाल प्रचण्डलाई आन्दोलन नगर्न आग्रह गरेका छन् ।

आज काठमाण्डुमा आयोजित प्रचण्ड–नेपाल पक्षको प्रेस संगठन नेपालको राष्ट्रिय भेलामा बोल्दै लेखक वाग्लेले केही दिनअगाडि मांसाहारी आन्दोलनको आवश्यकता परेको बताएका प्रचण्डतिर संकेत गर्दै वाग्लेले द्वन्द्वको घाउ अझै बाँकी रहेकाले त्यसो नगर्न आग्रह गरेका हुन् ।

‘कमरेड प्रचण्डज्यूले भन्नुभयो, मांसाहारी आन्दोलन चाहियो । हिजोका द्वन्द्वको घाउ बाँकी नै छ । यसो गर्नुभयो भने नागरिकको साथ पाउनुहुन्न,’ उनले भने ।

उनले प्रधानमन्त्री केपी शर्मा ओलीले संसदमा र काठमाण्डुका मेयर विद्या सुन्दर शाक्यले कमलपोखरीमा डोजर चलाएको समेत बताए ।‘प्रधानमन्त्रीले दिउँसै संसदमा डोजर चलाए, तपाईंहरूकै मेयरले राति कमलपोखरीमा डोजर चलाए,’ वाग्लेले भने ।

वाग्लेले प्रतिनिधिसभा पुनर्स्थापना नभई संविधानको रक्षा नहुने भन्दै संसद पुर्नस्थापना हुने पनि दाबी गरे ।