काठमाण्डु – नेपाली सेनाले काठमाण्डु उपत्यकामा निषेधाज्ञा तथा कर्फ्युको समय घटाउँदै लगेको छ।

पछिल्लो सुरक्षा परिस्थितिको विश्लेषणका आधारमा नागरिकको जनधनको सुरक्षाको लागि जारी भएको निषेधाज्ञा तथा कर्फ्यु आदेशलाई निरन्तरता दिनुपर्ने आवश्यकता देखिएकोले काठमाण्डु, ललितपुर र भक्तपुर जिल्लाका सुरक्षा समितिहरुबाट यस्तो व्यवस्था गरिएको जारी सूचनामा भनिएको छ ।

सैनिक जनसम्पर्क निर्देशनालयका अनुसार शुक्रबार बिहान ६ बजेदेखि ११ बजेसम्म र साँझ ५ बजेदेखि ७ बजेसम्म निषेधाज्ञा जारी गरिएको छ । यसअवधिमा अत्यावश्यक कामको लागि नागरिकलाई आवतजावत गर्न दिइने छ।

शुक्रबार बिहान ११ बजेदेखि साँझ ५ बजेम्म निषेधाज्ञा तथा बेलुकी ७ बजेदेखि शनिबार बिहान ६ बजेसम्म भने कर्फ्यु आदेश जारी रहने छ।

निषेधाज्ञा तथा कर्फ्युको समयमा पनि अत्यावश्यक सेवाका जस्तै एम्बुलेन्स, शव वाहन, दमकल, स्वास्थ्यकर्मी, सुरक्षाकर्मी र सञ्चारकर्मीका साथै खाद्यान्न, ग्यास, इन्धन, दुध, तरकारी, पानी, सञ्चार प्रदायक कम्पनी र औषधि ओसारपसार गर्ने सवारी साधन सञ्चालन गर्न सकिने छ।

विभिन्न सरकारी कार्यालय, मानव अधिकार आयोगका पदाधिकारी, बैंक तथा वित्तिय संस्था लगायत सार्वजनिक संस्थानहरुमा कार्यरत कर्मचारीहरुले आफ्नो सक्कल परिचयपत्र देखाइ कार्यालयसम्म आवतजावत गर्न सक्ने सूचनामा उल्लेख छ ।

साथै आन्तरिक र वाह्य उडानका यात्रुहरुले आफ्नो उडानको टिकट देखाएर विमानस्थलसम्म आवतजावत गर्न सक्नेछन्।