केरुङ हुंदै सेनालाई आयो ३० ट्रक सैन्य सहयोग, काठमाडौंमा सैन्य अभ्यास जारी
काठमाडौं– चिनियां राष्ट्रपति सि जिनफिङको नेपाल भ्रमणपूर्व चीनले नेपाली सेनालाई ठुलो मात्रामा सैनिक सहयोग हस्तान्तरण गरेको छ । प्रधानसेनापति पूर्णचन्द्र थापा गत असारमा एक साता लामो चीन भ्रमणमा जांदा सैनिक सहायतासम्बन्धी सम्झौतामा हस्ताक्षर भएको थियो ।
चिनले २३ करोड ९५ लाख ५० हजार बरावरको सैनिक सहयोग नेपाली सेनालाई हस्तान्तरण गरेको हो । सम्झौताबमोजिम सहायता सामाग्री केरुङ हुंदै ३० ट्रक काठमाडौं पुगेको हो । सैनिक सामाग्री नेपाली सेनाका ट्रकमा लोड गरेर केरुङबाट शनिवार सांझ काठमाडौं पुगेको सैनिक स्रोतको दावी छ ।
चिनियां जनमुक्ति सेनाबाट नेपाली सेनालाई मानवीय सहायता तथा विपद् व्यवस्थापन सहयोगअन्र्तगत प्रदान भएको १५० मिलियन आरएमबी बराबरको सामग्रीहरु (हेवि मेकानिकल व्रिज,एक्सप्लोसिभ ओर्डेनेन्श डिसपोजल, इन्जिनियरिङ्ग सामाग्री र रेसक्यु किट तथा विभिन्न प्रकारका सवारी साधनहरु प्राप्त भएको बताइएको छ ।
चीनियां जनमुक्ति सेनाको औपचारिक निमन्त्रणामा असार ०१ गतेदेखि ७ सम्म चीन भ्रमणमा गएका प्रधानसेनापति थापाले बेइजिङ्गमा चिनियां सेनाका चिफ अफ जोइन्ट स्टाफ एवंम् केन्द्रिय सैनिक आयोगका सदस्य जनरल ली जुछेङ्ग र रक्षामन्त्री वेई फेंगेंसंग भेटवार्ता गरेका थिए ।
चीन र नेपालबीच पछिल्लो समय सैनिक सम्बन्ध समुधुर हुंदै गएको छ । नेपाल र चीनबीचको संयुक्त सैन्य अभ्यास गत बुधबारबाट काठमाडौंमा सुरु भएको छ।सगरमाथा फ्रेन्डसिप संयुक्त तालिम २०१९ नामाकरण गरिएको उक्त अभ्यास भदौ २४ सम्म चल्ने सेनाले जनाएको छ ।
नेपाली सेनाको विशेष बाहिनी महाराजगन्जमा औपचारिक रूपमा सैन्य अभ्यास सुरु भएको हो । उक्त अभ्यास भक्तपुरको नगरकोटमा समेत गर्ने सेनाको तयारी छ । सैन्य अभ्यासमा दुवै देशका महासेनानीको नेतृत्वमा २२ \२२ जना सहभागी छन्।
सैन्य अभ्यास प्रतिआतंकवाद युद्धकला, विपद् व्यवस्थापनलगायत विषयमा केन्द्रित छ। दुवै देशका सेनाले २०७४ देखि सैन्य अभ्यास गर्दै आएका छन्।
