काठमाण्डु – नेकपा माओवादी केन्द्रका अध्यक्ष पुष्पकमल दाहाल प्रचण्डले प्रधानमन्त्री शेरबहादुर देउवालाई नेपाली क्रिकेट खेलाडीहरूमाथि गरिएको कारबाहीबारे ध्यानाकर्षण गराएका छन् ।

शुक्रबार प्रधानमन्त्री देउवालाई प्रचण्डले बालुवाटारमा भेटेर खेलाडीहरुमाथि गरिएको कारबाहीको ध्यानाकर्षण गराएको प्रचण्डकी स्वकीय सचिव गंगा दाहालले जानकारी दिइन् ।

यसअघि नेपाल क्रिकेट संघ (क्यान) को बुधबार बसेको बोर्ड बैठकले ज्ञानेन्द्र मल्ललाई कप्तान र दीपेन्द्रसिंह ऐरीलाई उपकप्तानबाट हटाएको थियो ।

मल्ल र ऐरीसहित अलराउन्डर सोमपाल कामी र बलर कमलसिंह ऐरीलाई सन् २०२२ को वर्गीकरणबाट प्राप्त हुने ६ महिनाको तलब नदिने निर्णय भएको थियो ।

यस्तै भेटका क्रममा प्रतिनिधिसभा बैठक सुचारू गर्ने लगायतका समसामयिक राष्ट्रिय मुद्दामा सर्वदलीय बैठक बोलाउने विषयमा पनि छलफल भएको स्वकीय सचिव दाहालले उल्लेख गरेकी छन् ।

‘सदन सुचारु गर्नेलगायतका समसामयिक राष्ट्रिय मुद्दामा प्रमले सर्वदलीय बैठक बोलाउने विषयमा छलफल भयो,’ उनले भनेकी छन्, ‘सोही अवसरमा अध्यक्ष प्रचण्डले क्रिकेट खेलाडीमाथि गरिएको भनिएको कारबाहीबारे प्रधानमन्त्रीको ध्यानाकर्षण गराउनुभएको थियो ।’