म त खुइलिएँ, तपाईंहरूको राजनीतिक अभिष्ट पूरा होस् : रवीन्द्र मिश्र
काठमाण्डु- विवकेशील साझा पार्टीको अध्यक्षबाट राजीनामा दिएका रवीन्द्र मिश्रले आफ्ना मित्रहरूमा समर्पित गर्दै कटाक्षपूर्ण टिप्पणी गरेका छन् । स्थानीय तहको निर्वाचनमा पार्टीको पराजयपछि अध्यक्षबाट राजीनामा दिएका मिश्रले बुधबार सामाजिक संजाल ट्विटरमार्फत् कटाक्ष गरेका हुन् ।
‘ती (अ) मित्र (हरू) मा समर्पित जसले मलाई प्रत्यक्ष भेटमा सिधै भनेका थिए, ‘तपाईंलाई नखुइल्याई त मेरो र हाम्रो राजनीतिक अभिष्ट नै पूरा हुँदैन नि!’ अब म खुइलिएँ। तपाईं(हरू)को राजनीतिक अभीष्ट पूरा होस् ! यो देश हाम्रै जीवनकालमा रूपान्तरण होस्। तपाईं(हरू)लाई शुभकामना छ’, उनले सामाजिक सञ्जालमा लेखेका छन् ।
स्थानीय तह निर्वाचनमा पार्टीको पराजय भएको भन्दै मिश्रले राजीनामा दिएका थिए । राजीनामा दिँदै मिश्रले पार्टी संयोजक लगायतका नेतालाई गरिएको कारबाही फिर्ता लिन र राजीनामा दिएका नेताहरूलाई पुनः पार्टीमा फर्किन आग्रह पनि गरेका थिए ।
मिश्रका अनुसार उनले प्रस्तुत गरेको ‘विचारभन्दा माथि देश’ दस्तावेज पार्टीको केन्द्रीय समितिको दुईतिहाइभन्दा बढी मतले पारित गरेको भए पनि बहुमतको निर्णयविरुद्ध भएका गतिविधिका कारण पार्टी संयोजकलगायत कतिपयलाई कारबाही गरिएको थियो।
