काठमाण्डु – अर्थमन्त्री रामेश्वर खनालले सबै मन्त्रालयको प्रणालीमा सुधार गर्ने काम भइरहेको बताएका छन् ।

शनिबार नेपाल उद्योग वाणिज्य महासंघले आयोजना गरेको आर्थिक बहस २.० कार्यक्रममा बोल्दै उनले प्रत्येक मन्त्रालयको प्रणालीमा सुधार गर्ने काम भइरहेको भन्दै भन्सार प्रशासनमा लागत कम हुने गरी आमूल सुधार गर्ने प्रयत्न भइरहेको जानकारी दिए ।

उनले भने, ‘प्रत्येक मन्त्रालयको प्रणालीमा सुधार गर्ने काम भइरहेको छ । अर्थ मन्त्रालयमा पनि यहाँहरूले देख्नुभएकै छ, भन्सार प्रशासनमा लागत कम हुने गरी आमूल सुधार गर्ने प्रयत्न भइरहेको छ ।’

उनले आमनागरिकले कर तिर्नको लागि सहज पहुँच पाउने गरी कर तिर्ने विन्दुहरूलाई विस्तार गरिएको जानकारी दिए ।

७७ जिल्ला र ठूलो बजारको आकार ग्रहण गरेका ठाउँहरू करीब १२० ठाउँमा उद्यमी व्यवसायले कर दाखिला गर्न र प्यान नम्बर लिन पहुँच प्राप्त गर्ने व्यवस्था गरिएको उनले बताए ।

उनले भने, ‘आमनागरिकले कर तिर्नको लागि सहज पहुँच पाउनुपर्छ भन्नको लागि कर तिर्ने विन्दुहरूलाई विस्तार गर्दै लगेर ७५३ नगरपालिकामा १ वर्षभित्रै पुग्ने र तत्काल पुग्न नसक्ने भएकाले ७७ जिल्ला र ठूलो बजारको आकार ग्रहण गरेका ठाउँहरू करीब १२० ठाउँमा उद्यमी व्यवसायले कर दाखिला गर्न र प्यान नम्बर लिन पहुँच प्राप्त गर्ने व्यवस्था गरिएको छ । यो तत्कालको सुधार हो ।’  

निजी क्षेत्र र सरकार मुलुकको विकास, समृद्धि र रोजगारको साझेदार भएको बताउँदै उनले निजी क्षेत्र र सरकार सहकार्य अपरिहार्य रहेको धारणा राखेका छन् ।