काठमाण्डु – नेकपा एकीकृत समाजवादीकी नेत्री रामकुमारी झाँक्रीलाई स्पष्टीकरण पेश गर्न ७ दिनको समय दिइएको छ ।

मंगलबार बसेको सचिवालय बैठकले झाँक्रीलाई लिखित आत्मालोचनासहित स्पष्टीकरण बुझाउन थप ७ दिनको समय दिने निर्णय गरेको छ ।

अध्यक्ष माधवकुमार नेपाल लक्षित अभिव्यक्तिबारे लिखितमा स्पष्टीकरण दिन भनिएको छ । स्रोतका अनुसार ७ दिनभित्र चित्तबुझ्दो जवाफ नदिए थप निर्णय हुने जनाइएको छ । अध्यक्ष नेपालनिकट नेताहरूले नेत्री रामकुमारीलाई पार्टीबाटै निष्कासन गर्नुपर्ने माग गरिरहेका छन् ।

अध्यक्ष नेपालविरुद्ध अख्तियार दुरुपयोग अनुसन्धान आयोगले भ्रष्टाचार मुद्दा दायर गरेपछि नेत्री झाक्रीले सिनो बोकेर हिँड्न नसकिने अभिव्यक्ति दिएकी थिइन् । भ्रष्टाचार मुद्दा लागेपछि सार्वजनिक पदधारण गरेका व्यक्ति स्वत: निलम्बन हुने प्रावधान भएपछि अध्यक्ष नेपालले पदीय जिम्मेवारी छाडेका छैनन् ।