काठमाण्डु – नेकपाको प्रचण्ड–नेपाल समूहकी नेतृ रामकुमारी झाक्रीले केहि दिनअघि राष्ट्रपति विद्यादेवी भण्डारीविरुद्ध दिएको विवादित अभिव्यक्तिबारे स्पष्टिकरण दिएकी छन् ।

संसद विघटनको विरोधमा प्रचण्ड–नेपाल समूहले राजधानीमा आयोजना गरेको आमसभालाई सम्बोधन गर्दै झाक्रीले राष्ट्रपति विद्यादेवी भण्डारीविरूद्ध विवादमा परेको उनको केही दिनअघिको अभिव्यक्तिबारे स्पष्टिकरण दिएकी हुन् ।

आतमा कालो पट्टि र मुखमा कालो टेप टाँसेर ड्यासमा बोल्न पुगेकी उनले बोल्नका लागी आफुहरु जन्मिएको भन्दै ओलीको प्यादा बन्ने जो–कसैको विरोध गर्ने बताइन् ।

‘संस्थाको कुनै लिंग हुँदैन । त्यो सार्वजनिक हुन्छ,’ झाँक्रीले भनिन्, ‘बोल्न पाइन्छ । हामी बोल्न जन्मिएका हौं । प्रधानमन्त्री ओलीको प्यादा बन्ने व्यक्तिको विरोध गर्न पाइन्छ ।’

प्रधानमन्त्री केपी शर्मा ओलीले पुस ५ गते संसद विघटन गरेपछि विभाजित भएको प्रचण्ड–नेपाल समूहले ओलीको कदमको विरोध गर्दै आइरहेको छ ।

कार्यक्रममा सञ्चालक लीलामणि पोखरेलले बोल्न नाम डाकेपछि झाँक्रीले प्रतिगमन मुर्दावाद लेखिएको कपडा शरीरबाट निकालेर फालेकी थिइन् ।

केही दिनअघि झाँक्रीले गोरखा पुगेर संसद विघटनमा राष्ट्रपति भण्डारीले भूमिकाको आलोचना गर्दै उनलाई शितलनिवासबाट निस्केर बालकोट जान भनेकी थिइन् ।