काठमाण्डु – प्रतिनिधिसभा निर्वाचन नजिकिँदै गर्दा राष्ट्रिय स्वतन्त्र पार्टी (रास्वपा) मा एकपछि अर्को नेताहरू पार्टी छाड्ने क्रम जारी छ ।

पछिल्लो तीन सातामा केन्द्र, प्रदेश र स्थानीय तहका नेताहरूले क्रमशः पार्टी परित्याग गरेका छन्। पार्टीका मकवानपुर सभापति भरत पराजुलीले पनि पार्टी छाडेर नेपाली कांग्रेसमा प्रवेश गरेका छन् ।

काङ्ग्रेसका सभापति थापाले पराजुलीलाई सर्लाहीमा स्वागत गरेका छन् । उनी प्रतिनिधिसभा निर्वाचनमा रास्वापाबाट टिकट नपाएपछि असन्तुष्ट थिए।

पार्टीको भनाइ र गराइमा एकरूपता नदेखिएको, टिकट वितरण र निर्णय प्रक्रियामा पारदर्शिता नभएको तथा नेतृत्व शैलीप्रति असहमति रहेको उनको आरोप छ। यस्तै आरोप पार्टी छाड्ने अन्य नेताहरूले पनि लगाएका छन् ।

त्यसअघि रास्वपाका केन्द्रीय तहका नेता प्रणय शमसेर राणाले पार्टीको वैकल्पिक राजनीतिक प्रतिबद्धता व्यवहारमा नदेखिएको, निर्णय प्रक्रिया सीमित घेरामा केन्द्रित भएको र आन्तरिक बहसको संस्कृति कमजोर बनेको आरोप लगाउँदै पार्टी परित्याग गरेका थिए।

यस्तै पश्चिम नवलपरासी सुस्ता गाउँपालिका उपसभापति गुप्त सेन ठकुरीले पनि हालै पार्टी परित्याग गरेका छन्। उनी रास्वपाका जिल्ला सभापति महेन्द्र सेन ठकुरीका दाजु हुन्।

वागमती प्रदेश उपसभापति दिपेन्द्र हुमागाईंले सदस्यता र आर्थिक व्यवस्थापनमा पारदर्शिताको अभाव, टिकट छान्नमा भेदभाव, आन्तरिक लोकतन्त्र कमजोर बन्दै गएको र पार्टी विधानको अवमानना भएको आरोप लगाउँदै राजीनामा दिएका हुन् ।

प्युठानका नगर सदस्य सूर्यबहादुर गैरेले रास्वपा छाडेर एमालेमा प्रवेश गरेका छन्। मधेस प्रदेशकी संस्थापक सभापति रहेकी ममता शर्मा र बर्दघाटका नेता जीतबहादुर हरिजनले पनि पार्टी छोडेका हुन्।