काठमाण्डु – राष्ट्रिय स्वतन्त्र पार्टी (रास्वपा)का अन्तर्राष्ट्रिय सम्बन्ध विभाग प्रमुख शिशिर खनालले रास्वपा नेतृत्वको सरकार बनेपनि नेपालको विदेश नीतिमा ठुलो परिवर्तन नहुने स्पष्ट पारेका छन् ।

उनले नेपालको परराष्ट्र नीति संविधान निर्दिष्ट गरेको असंलग्नताको सिद्धान्तमै आधारित हुने बताउँदै विदेशी नीतिमा ठुलो रुपान्तरणकारी किसिमको नीतिगत फेरबदल नहुने जनाएका छन् ।

बीबीसी नेपाली सेवासँगको कुराकानीमा प्रमुख खनालले रास्वपाको घोषणापत्रमा सन्तुलित र गतिशील कूटनीति अवलम्बन गर्ने प्रतिवद्धता व्यक्त भएको उल्लेख गरे ।

‘असंलग्न परराष्ट्र नीति, नेपालको भौगोलिक अखण्डता र राष्ट्रिय सार्वभौमसत्ताबारे संविधानमै स्पष्ट उल्लेख छ। यही नै रास्वपाको कूटनीतिको मूल आधार हुनेछ’ कुराकानीमा उनले भने, ‘यसका साथै आगामी सरकारको जोड आर्थिक कूटनीति र विकास कूटनीतिमा रहनेछ । सभापति रवि लामिछानेले पनि विकास कूटनीतिको कुरा गरेका छन् ।’

रास्वपाले दुवै छिमेकी भारत र चीनसँगको सम्बन्धलाई अत्यन्त महत्व दिएको पनि खनालले बताए ।

भारत महत्वपूर्ण छिमेकी भएको र भारतसंग सयौँ वर्षदेखि सांस्कृतिक, सामाजिक र आर्थिक सम्बन्ध रहेको उल्लेख गर्दै खनालले भने, ‘भूगोलले अत्यन्तै नजिक राखेको भारत र चीन दुवैसँग हामी आपसी सम्मान र नेपालको आर्थिक हितलाई केन्द्रमा राखेर सम्बन्ध अघि बढाउने छौंँ ।’

नेपालले सुरक्षा संवेदनशीलतालाई ध्यान दिएर एक चीन नीति अख्तियार गरेको जनाउँदै उनले रास्वापाले पनि त्यही नीति अघि बढाउने स्पष्ट पारे ।

चीनको आर्थिक प्रगतिबाट लाभ लिने नीतिमा रास्वपा रहेको पनि उनले बताए ।

‘बीआरआईअन्तर्गतका परियोजनाबारे अहिले ठोस निर्णय नभएको उनको भनाइ छ । ‘तर, परियोजना विशेषका लगानीको ढाँचादेखि सामाजिक र आर्थिक विश्लेषण गरेर निर्णय गर्ने विषय हुन् । नेपालको आवश्यकता र लगानीको मोडललाई हेरेर निर्णय गर्छौँ’, खनालले भने ।

अमेरिकासँग रास्वपाले मित्रवत र सुमधुर सम्बन्ध राख्ने जनाउँदै उनले नेपालले कहिल्यै पनि कुनै पनि राष्ट्रसँग सुरक्षासम्बन्धी गठबन्धन नगर्ने नीति लिएको र रास्वपाले त्यही नीतिलाई अङ्गीकार गर्ने पनि स्पष्ट पारे ।