काठमाण्डु– राष्ट्रिय स्वतन्त्र पार्टीले प्रचारप्रसार विभाग र प्रवास नेपाली सम्पर्क विभागलाई थप गतिशील बनाउने निर्णय गरेको छ ।

बुधबार बसेको सचिवालय बैठकले पार्टीको संगठन गतिविधि, प्रशिक्षण कार्यक्रम, हस्ताक्षर अभियान लगायतका विषयमा र आगामी कार्यक्रम वारे छलफल गर्दै ५ वटा निर्णय गरेको हो ।

बैठकले समसामयिक राजनीतिक एवं संगठन गतिविधि, केन्द्रीय विभागहरूलाई गतिशील बनाउने, प्रदेश, जिल्ला र तल्लो संरचना सुदृढीकरण, रूपन्देही–३ उपनिर्वाचन, कार्यविधि स्वीकृत लगायतका ५ निर्णय गरेको छ ।

बैठकले गरेका निर्णयहरु यस्ता छन्

१ केन्द्रीय विभागहरूलाई गतिशील बनाउन केन्द्रीय सङ्गठन विभाग, केन्द्रीय प्रशिक्षण विभाग, केन्द्रीय अभियान तथा प्रचारप्रसार विभाग र प्रवास नेपाली सम्पर्क विभागलाई थप गतिशील बनाउने ।

२ प्रदेश तथा जिल्ला संगठनलाई थप रणनीतिक रूपमा सशक्त बनाउन, वडा अधिवेशन, पालिका अधिवेशन र जिल्ला अधिवेशन तोकिएको समयमा सम्पन्न गर्ने लक्ष्य, तालिका र कार्यनीति तयारीका लागि आवश्यक अख्तियारी प्रदेश इन्चार्जलाई दिने र संगठन सुदृढीकरणका लागि रणनीतिक प्रस्ताव सचिवालयमा पेश गर्न निर्देशन दिने निर्णय गरियो ।

३ रूपन्देही–३ मा हुने उपनिर्वाचनका लागि उम्मेदवार छनोट प्रक्रिया लोकतान्त्रिक, पारदर्शी, जनपक्षीय र योग्यताका आधारमा हुने व्यवस्थाको सर्वत्र स्वीकार्यता देखिएकोप्रति कृतज्ञता व्यक्त गर्दै यस कार्यमा सहयोग पुर्‍याउने रूपन्देहीका नागरिकहरू तथा सम्पूर्ण नेपाली दाजुभाइ दिदीबहिनीहरूमा धन्यवाद ज्ञापनसहित आगामी छनोट प्रक्रियामा पनि साथ दिन अनुरोध गर्ने ।

प्रारम्भिक छनोट प्रक्रियामा असाध्यै मेहनत, उत्साह र इमानदारीका साथ सहभागी भएका ९ उम्मेदवारहरूको भूमिकाप्रति कृतज्ञता व्यक्त गर्दै, प्रारम्भिक निर्वाचनलाई महत्वपूर्ण मानिएकोले सामाजिक आचारसंहिताभित्र रही सद्भावपूर्ण सहभागिताका लागि सबैलाई आह्वान ।

४ पार्टीले सञ्चालन गर्ने प्रारम्भिक निर्वाचन कार्यविधि, २०८२ र वडा परिषद् कार्यविधि, २०८२ स्वीकृत ।

५ कृषि, स्वास्थ्य, उद्योग तथा वाणिज्य, श्रम तथा रोजगार तथा सहकारी क्षेत्रका विज्ञहरूलाई सम्बन्धित क्षेत्रका समस्या विश्लेषण, समाधानका उपायहरूको पहिचान तथा अन्वेषण गर्ने र विज्ञहरूसँगको छलफलमार्फत राष्ट्रिय समृद्धिमा योगदान पुर्‍याउन आवश्यक नीति–कार्यक्रमका सुझावसहितको प्रतिवेदन पेश गर्ने कार्यमा संलग्न गराउने ।

यसै सन्दर्भमा, उल्लेखित क्षेत्रका विज्ञहरूलाई मन, वचन र कर्मले राष्ट्र निर्माणमा योगदान दिन आह्वान गरिएको छ ।