काठमाण्डु- राप्रपा प्रदेश १ सरकारबाट तत्काल नबाहिरिने भएको छ । संघीय सरकारको नेतृत्व गरिरहेको नेकपा माओवादी केन्द्रले नयाँ राजनीतिक समीकरण बनाएपछि सत्ता गठबन्धनमा रहेको राप्रपाले संघ र प्रदेश सरकारबाट बाहिरिने निणर्य गरेको थियो ।

सोही निर्णयका आधारमा संघ र बागमती प्रदेशबाट राप्रपा बाहिरिएको हो । तर, यत प्रदेश १ मा सरकारबाट भने राप्रपा तत्काल नबाहिरिने भएको छ ।

पार्टी नेतृत्वसँगको छलफलपछि मात्रै सरकारबाट बाहिरिने निर्णय गर्ने राप्रपा प्रदेश १ संसदीय दलका नेता तथा उद्योग कृषि तथा सहकारी मन्त्री भक्ती सिटौलाले जानकारी दिएका छन् ।

अन्य प्रदेशको तुलनामा प्रदेश १ को परिस्थिति फरक रहेका कारण छलफलपछि निर्णयमा पुगिने उनको भनाई छ । प्रदेश १ को प्रदेशसभामा सबैभन्दा ठूलो दल नेकपा एमालेसँग ४० सांसद छन् ।

दोस्रो दल कांग्रेसको २९, नेकपा माओवादी केन्द्रको सभामुखसहित १३, राप्रपाको ६, नेकपा एकीकृत समाजवादीसँग ४ र जसपाको १ प्रदेशसभा सदस्य छन् ।