चितवन–रास्वपाको प्रथम महाधिवेशनमा सहभागी हुन चितवन पुनेका सो पार्टीका नेता एवं ऊर्जा, जलश्रोत तथा सिंचाइमन्त्री विराजभक्त श्रेष्ठसँग कार्यकर्ताले श्रम संस्कृति पार्टीका अध्यक्ष हर्कराज राईलाई मुद्धा लगाएर फसाइदिन माग गरेका छन् ।

मन्त्री श्रेष्ठ आइतबार महाधिवेशन उदघाटन स्थल गेष्ट हाउसचौर प्रवेश गर्दै गर्दा केही कार्यकर्ताले रोकेर त्यस्तो माग गरेका हुन् । हर्कले संसदमा तहसनहस गरिरहेकाले उनलाई ५ करोडको मुद्धा लगाएर थुन्नुपर्ने माग ती कार्यकर्ताले राखे ।

‘संसदमा ‘हर्के’ ले एकदम तहसनहस गरेको छ, त्यसलाई ५ करोडको मुद्धा लगाएर निकालेर ५ वर्ष थुन्नुपर्छं । त्यसो नगरे हुँदै हुँदैन’, रास्वपा कार्यकर्ताले भनेका छन् ।

श्रेष्ठ त्यसको जवाफ नदिई अघि बढ्न खोज्छन् । त्यहीबीच अर्का एक कार्यकर्ताले उनलाई रोक्दै पार्टीमा रवि र बालेनको नाममा गुटबन्दी भए स्वीकार्य नहुने चेतावनी दिन्छन् ।

उनले नगर, प्रदेश र जिल्ला अधिवेशनमार्फत रास्वपामा गलत प्रवृत्तिका मानिसहरुको प्रवेश भएको रिपोर्टिङ मन्त्री श्रेष्ठलाई गरे । उनले सभापतिमा रवि लामिछाननेको विकल्प खोज्ने काम भए नराम्रो हुने पनि चेतावनी दिए ।

‘जिल्लामा, प्रदेशमा र नगरमा महाधिवेशन भयो । माथि केन्द्रमा त सबै राम्रो छ । तर, यहाँ के भएको छ भने एकदम गलत प्रवृत्तिका मान्छेहरु प्रवेश गरेर । हाम्रो राष्ट्रिय स्वतन्त्र पार्टीलाई कमजोर गर्ने प्रयास गरिराका छन् । मैले आफ्नो ठाउँबाट हेर्ने चाहिं हेरें, बुझें । तपाईंहरुसँग आएर भन्न टाइम हुँदैन तपाईंहरुरुलाई मसँग भेट्नलाई । अब यहाँ भेट्दाखेरि भन्न त पाउनुपर्यो’, उनले भने, ‘हाम्रो राष्ट्रिय स्वतन्त्र पार्र्टी के फाइदाका लागि त आएको होइन नि ? यहाँ मान्छेहरुले यस्तो भ्रम फैलाएका छन् । बालेनको र यो भनेका छन् । हाम्रो राष्ट्रिय स्वतन्त्र पार्टीको सभापति आदरणीय रवि लामिछानेज्यू नै हुनुपर्छ । यदि कसैले आफ्नो व्यक्तिगत फाइदाका लागि गर्छ भने दाई एकदम नराम्रो हुनेवाला छ ।’

कार्यकर्तालाई थामथुम पार्दै मन्त्री श्रेष्ठले महाविधेशन यस्तै विषयलाई फिल्टर गर्नका लागि आयोजना गरिएको बताए ।

उनले यस्ता कुरा गर्न छाडेर टाढाबाट आएका प्रतिनिधिहरुको बस्नेलगायत व्यवस्था गर्न र स्वयंसेवकको भूमिकामा खटिन आग्रह गरे ।

‘महाधिवशेन भनेको त त्यस्तै चिजहरुलाई त फिल्टर गर्दै जाने हो । तपाईंहरुको जिम्मेवारी के हुनुपर्यो भने टाढाबाट साथीहरु आउनुभएको छ । बरु उहाँहरुको के छ बस्ने यताउता हेर्दै गर्नुस् । स्वयं सेवा गर्न साथीहरु लागेका छन्, त्यसमा फोकस गरौं न ।’