जनकपुरधाम – नेकपा एमालेका नेता महेश बस्नेतविरुद्ध धनुषामा प्रदर्शन गरिएको छ ।

राष्ट्रिय स्वतन्त्र पार्टी (रास्वपा) धनुषा एवं मधेश प्रदेश र्‍याट विभागका सदस्यहरूले बिहीबार बेलुका जिल्लाको सदरमुकाम जनकपुरधाममा महेश बस्नेतविरुद्ध प्रदर्शन गरेको छ । उनीहरूले बस्नेतको तस्वीर पनि जलाएका छन् ।

केही दिनअघि बालेन जनकपुरधाम आउँदा मैथिली भाषामा गरेको भाषणमा प्रयोग भएको छौरा शब्दको अनर्थ निकालेर बस्नेतले गरेको टिप्पणी अशोभनीय रहेको भन्दै रास्वपाका नेता–कार्यकर्ताले विरोध गरेको रास्वपाको मधेश प्रदेश र्‍याट विभाग प्रमुख अम्भु साहले जानकारी दिए ।

उनले कुनै एक भाषाको शब्दको अर्थ अर्को भाषामा फरक हुनु स्वाभाविक भएको भन्दै कुनै पनि पार्टीको पदाधिकारीले सो कुरालाई लिएर मजाक बनाउन नहुने बताए ।

एमालेलाई बालेन प्रधानमन्त्री हुने भएको कुरा नपचेकोले टीका–टिप्पणी गर्दै हिँडेको रास्वपा र्‍याट विभाग मधेश प्रदेशका प्रमुख साहले बताए । साहले जेनजी आन्दोलनमा एमालेकै कारणले कैयौको हत्या भएको आरोप लगाए ।