काठमाण्डु –उत्तर कोरियाले युक्रेन विरुद्धको युद्धलाई समर्थन गर्न रुसमा थप सेना पठाएको बताइएकाे छ ।

बुधबार दक्षिण कोरियाको जासुसी एजेन्सीले उत्तर कोरियाले रुस–युक्रेन मोर्चामा तैनाथ आफ्ना सैनिकहरूको ठूलो क्षति भएपछि रुसमा थप सेना पठाएको बताएको हाे ।

राष्ट्रिय गुप्तचर सेवा (एनआइएस) ले एक विज्ञप्तिमा उत्तर कोरियाले रुसमा कति सैनिक तैनाथ गरेको छ भनेर यकिन गर्ने प्रयास गरिरहेको बताएको छ ।

यस क्षेत्रबाट अस्थायी रूपमा फिर्ता भएको रिपोर्टपछि फेब्रुअरीको पहिलो हप्तामा उत्तर कोरियाली सेनालाई रुसको कुर्स्क क्षेत्रका मोर्चाहरूमा पुनः तैनाथ गरिएको एनआइएसले अनुमान गरेको छ ।   युक्रेनी राष्ट्रपति भोलोदिमर जेलेन्स्कीले फेब्रुअरी ७ मा एक सम्बोधनमा कुर्स्कमा नयाँ युक्रेनी आक्रमणको पुष्टि गरे र उत्तर कोरियाली सेनाहरू त्यहाँ रूसी सेनाका साथमा लडिरहेको बताएका थिए ।

अमेरिकी, दक्षिण कोरियाली र युक्रेनी गुप्तचर अधिकारीहरूका अनुसार उत्तर कोरियाले रूसलाई ठूलो मात्रामा परम्परागत हतियारहरू आपूर्ति गरिरहेको छ र गत शरदमा यसले रूसमा लगभग १० हजारदेखि १२ हजार सैनिक पठाएको थियो । उत्तर कोरियाली सैनिकहरू अत्यधिक अनुशासित र राम्ररी प्रशिक्षित छन् तर पर्यवेक्षकहरूका अनुसार उनीहरू युद्ध अनुभवको कमी र भूभागको अपरिचितताका कारण रूस–युक्रेन युद्ध क्षेत्रमा ड्रोन र तोपखाना आक्रमणका लागि सजिलो लक्ष्य बनेका छन् ।

जनवरीमा एनआइएसले करिब ३ सय उत्तर कोरियाली सैनिकको मृत्यु भएको र अन्य २७ सय घाइते भएको बताएको थियो । जेलेन्स्कीले यसअघि उत्तर कोरियामा मारिएका वा घाइते भएका व्यक्तिको सङ्ख्या ४ हजार रहेको बताएका थिए।

यसअघि बुधबार दक्षिण कोरियाको समाचार पत्र जोङआङ इल्बोले अज्ञात स्रोतलाई उद्धृत गर्दै जनवरीदेखि फेब्रुअरीसम्म कुर्स्कमा थप १ हजारदेखि ३ हजार उत्तर कोरियाली सैनिक तैनाथ गरिएको जनाएको थियो ।

गत हप्ता साउदी अरबमा भएको वार्तामा रूस र अमेरिका युद्ध अन्त्य गर्ने र आफ्नो कूटनीतिक र आर्थिक सम्बन्धहरू सुधार गर्ने दिशामा काम सुरु गर्न सहमत भएका थिए ।  वार्तामा युक्रेनी अधिकारीहरू भने उपस्थित भएका थिएनन् ।