काठमाण्डु – सत्तारुढ दल नेपाल कम्युनिष्ट पार्टी (नेकपा)की सचेतक शान्ता चौधरीले शहिदको त्याग र बलिदानको अपमान नगर्न अग्र पङ्तिमा रहेका नेताहरुलाई आग्रह गरेकी छन् ।

सांसद चौधरीले सामाजिक सञ्जालमार्फत शहिदको त्याग र बलिदानको अपमान नगर्न आग्रह गर्दै जनता र पार्टीको भविष्यको बारेमा पनि चिन्तित हुन आग्रह गरेकी हुन् ।

‘जनता र पार्टीको भविष्यको बारेमा पनि चिन्तित होऔं । नयाँ पुस्ताका अपेक्षाबारे चिन्तन गरेर ती अपेक्षा सम्बोधनको लागि योजना बनाऔं । शहीदको त्याग र बलिदानको अपमान नहोस् कतै,’ उनले भनेकी छन् ।

नेकपाभित्रको विवाद चरम उत्कर्षमा पुगेका बेला सांसद चौधरीले पछिल्लो समय नेताहरुको ध्यान राष्ट्रनिर्माणको एजेण्डामा नभई पद प्राप्तिका लागि मात्रै बढी केन्द्रित देखिएको टिप्पणी गरेकी छन् ।

सांसद चौधरीले लेखेकी छन्, ‘हाम्रा नेताहरूको ध्यान राष्ट्रनिर्माणको एजेण्डामा, जनताका असन्तुष्टिहरू सम्बोधन गर्ने एजेण्डामा छलफल गर्ने भन्दा बैठक बस्ने र पदको लडाइँकै लागि मात्र एजेण्डामा बढी केन्द्रित देखियो ।

उनले गणतन्त्र र संघीयताको बिरोधमा बाहिर सभाजुलुसहरू बढ्दै गैरहेकामा चिन्ता समेत व्यक्त गरेकी छन् ।