काठमाण्डु – प्रधानमन्त्री शेरबहादुर देउवाले अमेरिकी मिलेनियम च्यालेञ्ज कर्पोरेशन (एमसीसी) पारित गर्ने बताएका छन् ।

जलवायु सम्मेलनमा भाग लिएर नेपाल फर्किएका प्रधानमन्त्री देउवाले त्रिभुवन विमानस्थलमा सञ्चारकर्मीहरुसँग कुरा गर्दै दलहरुबीच सहमति गरेर एमसीसी पारित गर्ने बताएका छन् । संसद् अधिवेशन अन्त्य भएपछि अमेरिकाले यसबारे चासो व्यक्त गरिरहँदा प्रधानमन्त्रीले देउवाले संसद् अधिवेशन अर्कै कारणले बन्द गरेको र एमसीसीबारे नआत्तिन भनेर भनिसकेको बताए ।

प्रधानमन्त्री देउवाले एमसीसीकी नायब प्रमुख कार्यकारी अधिकृत (डेपुटी सीईओ) एलेक्सिया लतोर्तुसँगको भेटमा एमसीसी पास गर्ने भएकाले नआत्तिन आग्रह गरेको बताए ।

उनले भने, ‘सहमति गरेर हामी एमसीसी हामी पास गर्छाैं, संसद् अधिवेशन अर्कै कारणले बन्द गरेका हौं, आत्तिन पर्दैन भनेको छु ।’​

साथै उनले भारतीय समकक्षी नरेन्द्र मोदीलाई नेपाल भ्रमणको निम्तो दिएको बताएका छन् ।यस्तै मोदीले पनि आफूलाई भारत भ्रमणको निम्तो दिएको प्रधानमन्त्री देउवाले बताए ।

‘उहाँलाई मैले नेपाल भ्रमणमा आउनुस् भनेँ । तपाईंलाई नेपालमा स्वागत गर्छौं भनेँ । तपाईं पशुपतिनाथ, मुक्तिनाथ जानुहुन्छ, तपाईं धार्मिक ठाउँ जानुहुन्छ, नेपालमा आउनुस् भनेँ,’ उनले भने, ‘उहाँ आउन तयार छु भन्नु भएको छ । उहाँ नेपाल भ्रमणमा आउने मितिको चाहिँ कुरा भएको छैन ।’

प्रधानमन्त्री देउवाले प्रधानन्यायाधीश चोलेन्द्र समसेर जबरा प्रकरणबारे तत्काल केही प्रतिक्रिया नदिने बताए । उनले भने, ‘म अहिले बाहिरबाट आएको छु, आन्तरिक विषयमा बोल्दिनँ ।’ ​

प्रधानमन्त्रीको स्वागतमा काँग्रेस उपसभापति विमलेन्द्र निधि, गृहमन्त्री बालकृष्ण खाण, सञ्चारमन्त्री ज्ञानेन्द्र कार्की, परराष्ट्रमन्त्री नारायण खड्का, रक्षामन्त्री मिनेन्द्र रिजाल त्रिभुवन विमानस्थल पुगेका थिए ।