काठमाण्डु – अमेरिकी राष्ट्रपति डोनाल्ड ट्रम्प र रुसी राष्ट्रपति भ्लादिमिर पुटिनबिच अलास्कामा भएको वार्ता युद्धविराम घोषणाबिना नै टुंगिएको छ।

युक्रेन युद्ध अन्त्य गर्ने विषयमा उनीहरूले लगभग तीन घण्टा छलफल गरेका हुन्। त्यसपछि दुई नेताले १२ मिनेटको संयुक्त पत्रकार सम्मेलन गरेका थिए। त्यस अवधिमा उनीहरूले पत्रकारका कुनै प्रश्नको जवाफ दिएनन्।

संयुक्त पत्रकार सम्मेलन गरेर राष्ट्रपति ट्रम्प एयर फोर्स वनमार्फत वासिङ्टन डिसी फर्किएका छन् भने पुटिन पनि मस्को तर्फ लागेका छन् ।

वार्तापछि पुटिनले युक्रेन युद्धलाई दुःखद घटना भन्दै यसलाई अन्त्य गर्न आफू गहिरो चासो राख्ने बताए पनि उनले युद्धका मूल कारणहरू समाप्त गर्न आवश्यक रहेको दोहोर्‍याए। उनले युक्रेन र युरोपलाई वार्तामा बाधा नपुर्‍याउन चेतावनी दिएको अन्तर्राष्ट्रिय सञ्चारमाध्यमहरूले बताएका छन्।

पुटिनले यस भेटलाई समाधानको सुरुवाती बिन्दु भन्दै, ट्रम्पसँगको सम्बन्धलाई व्यावसायिक भएको उल्लेख गरे । उनले ट्रम्पको यदि २०२० को चुनावपछि उनी राष्ट्रपति रहन्थे भने युद्ध सुरु नै हुने थिएन भन्ने दाबीसँग सहमति जनाएका छन्।

ट्रम्पले भने वार्तामा धेरै बुँदामा सहमति भए पनि केही महत्त्वपूर्ण बुँदा अझै बाँकी रहेको बताएका छन्। उनले सबैभन्दा महत्त्वपूर्ण एउटा विषयमा सहमति हुन नसकेको जनाए, पनि त्यसलाई खुलाएनन्।

ट्रम्पले वासिङ्टनबाट अलास्का जाने क्रममा पत्रकारहरूलाई युद्धविराम घोषणा गर्ने चाहना प्रस्ट पारेका थिए। तर, घोषणा नगरी मञ्च छोड्दा उनी सन्तुष्ट देखिएनन्।

ट्रम्प र पुटिन करिब १० मिनेटसम्म मञ्चमा सँगै उभिएर सम्बोधन गरेका थिए। दुवैले वार्तामा प्रगति भएको जनाए पनि ठोस सम्झौतामा पुग्न सकेनन्। ट्रम्पले चाँडै युक्रेनी राष्ट्रपति भ्लोदिमिर जेलिन्स्की र युरोपेली नेताहरूसँग सम्पर्क गर्ने बताएका छन्।

वार्ताको अन्त्यमा ट्रम्पले पुटिनसँग सायद छिट्टै फेरि भेट हुने बताए भने पुटिनले जवाफमा भने, अर्को भेट मस्कोमा हुने बताए।

पुटिन १० वर्षपछि शनिबार अमेरिका यात्रा गरेका हुन्। त्यहाँ उनलाई बी २ बमवर्षक विमानले स्वागत गर्‍यो। रातो कार्पेटमा आइपुगेपछि ट्रम्पले उनको प्रशंसा पनि गरे। त्यसपछि पुटिन ट्रम्पको कारमा बसेर बैठकका लागि गएका थिए।