काठमाण्डु – पार्टी एकता जोगाउन नेकपा एमालेका दोस्रो तहका नेताहरुले सक्रियता बढाएका छन् । विघटित कार्यदलका सदस्यहरुले आज दिउँसो १ बजे एमालेका सांसदहरुसँग छलफल गर्ने भएका हुन् ।

एमाले केन्द्रीय कमिटीको बैठकले पार्टीको विवाद समाधान गर्न गठित १० सदस्यीय कार्यदल भंग गरेको थियो । छलफलमा कार्यदलका नेताहरु र एालेका सांसदहरुबीच १० बुँदे सहमतिको बारेमा छलफल गरिने सांसद यज्ञराज सुनुवारले जानकारी दिए ।

‘आजको बैठकमा पार्टीलाई एकताबद्ध बनाएर लैजान को बाधक बन्यो त ? यसबारेमा हामीले कार्यदलमा रहेका नेताहरुलाई सोध्न खोजेका हौं,’ उनले भने ।

कार्यदलले सर्वसम्मत रुपमा १० बुँदे सहमतिमा हस्ताक्षर गरेर अध्यक्ष केपी शर्मा ओली र वरिष्ठ नेता माधवकुमार नेपाललाई बुझाएको थियो । पार्टीले उक्त सहमति पनि अनुमोदन गरिसकेको छ ।

यसअघि लगातार दुई दिन एमालेका दुवै समुहका सांसदहरुले पार्टी एकताका लागि दबाब अभियान चलाएका थिए । ओली पक्षका कृष्णप्रसाद दाहाल, सूर्य पाठक, पदम गिरी, शान्ति पाख्रिन, यज्ञ बोगटी तथा माधव नेपाल पक्षका यज्ञराज सुनुवार, झपट रावल, जयकुमार राई, दीपकप्रकाश भट्ट लगायका सांसदले कार्यदलका नेताहरुसँग छलफल गर्ने निर्णय गरेका थिए ।

विघटित कार्यदलमा ओली पक्षबाट सुवास नेम्वाङ, बिष्णु पौडेल, प्रदीप ज्ञवाली, शंकर पोखरेल र बिष्णु रिमाल छन् भने माधव नेपाल पक्षबाट भीम रावल, घनश्याम भुसाल, सुरेन्द्र पाण्डे, गोकर्ण विष्ट र रघुजी पन्त छन् ।