काठमाण्डु – फिफा विश्वकप फुटबलको नकआउट चरणको अन्तिम खेलमा घानालाई हराउँदै कोलम्बिया अन्तिम १६ मा प्रवेश गरेको छ । अमेरिकाको कन्सास सिटी रङ्गशालामा शनिबार बिहान भएको खेलमा कोलम्बियाले घानालाई १ गोलले हराएको हो ।

खेलको १४ औँ मिनेटमा कोलम्बियाका जोन आरियासले गरेको गोल नै निर्णायक भयो । कोलम्बिया समूह केको विजेता र घाना समूह एलबाट तेस्रो स्थानमा रहने उत्कृष्ट टोली बनेर नकआउटमा पुगेका हुन् ।

फुटबल इतिहासमा यी दुई टोलीबीच पहिलो पटक प्रतिस्पर्धा भएको हो । योसँगै विश्वकप फुटबलमा अन्तिम–१६ को समीकरण पनि पुरा भएको छ ।

अब प्रि–क्वाटरफाइनलमा क्यानडा र मोरक्को, पाराग्वे र फ्रान्स, अमेरिका र बेल्जियम, पोर्चुगल र स्पेन, ब्राजिल र नर्वे, मेक्सिको र इङ्ग्ल्यान्ड, अर्जेन्टिना र इजिप्ट तथा स्विट्जरल्यान्ड र कोलम्बियाले खेल्ने छन् ।

प्रि–क्वाटरफाइनलको पहिलो खेलमा शनिबार राति नेपाली समयअनुसार पौने ११ बजे घरेलु टोली क्यानडा र मोरक्को तथा आइतबार बिहान पौने ३ बजे पाराग्वे र फ्रान्सबीच हुनेछ ।