काठमाडौं– तस्करीको साढे ३३ केजी सुन काण्डमा मुछिएका महानगरीय अपराध महाशाखाका प्रमुख एसएसपी दिवस लोहनीलाई गृहमन्त्रालयले फिर्ता बोलाउने तयारी गरेको छ । लोहनीसहित घटनामा मुछिएका डीएसपी प्रजित केसी र सई बालकृष्ण संजेललाई समेत फिर्ता बोलाउने निष्कर्शमा मन्त्रालय पुगेको छ ।

घटनाको बारेमा गृह मन्त्रालय र प्रहरी मुख्यालयले दुई वटा अलग–अलग छानविन समिती बनाएको थियाे । प्रहरी मुख्यालयले डिआईजी पुष्कल रेग्मीको संयोजकत्वमा गठन गरेको छानविन समितीले अपराध महाशाखाको टोलीलाई बचाउन खोजेको समाचार सार्वजनिक भएपछि गृहले सह-सचिव ईश्वर पौडेल नेतृत्वको अर्को छानविन समीती गठन गरेको थियो ।

गृहमन्त्रालयले गठन गरेको छानविन समितीले एसएसपी लोहनीसहित अन्य अधिकृतलाई फिर्ता बोलाउन गृहमन्त्री रामबहादुर थापालाई सुझाव दिइसकेको छ ।  गृहमन्त्रालय स्रोतले दिएको जानकारी अनुसार लोहनीसहित तीनै जनालाई आजै मुख्यालय तान्ने तयारी भएको छ ।

३३ किलो सुन काण्डका भरिया सनम शाक्यको हत्या भएपछि पनि सुन बरामद् नहुनु र मुख्य तस्करलाई पनि भगाइएका कारण प्रहरीको शंकास्पद भूमिका देखिएको भन्दै अनुसन्धान गर्नुपर्ने आवाज उठेको थियो ।