काठमाण्डु – प्रहरी जवानको ज्यान जाने गरी मोरङको लेटाङमा भएको घटना छानबिनका लागि ५ सदस्यीय समिति गठन भएको छ ।

प्रदेश १ प्रहरी कार्यालय अन्तर्गत अपराध नियन्त्रण तथा अनुसन्धान महाशाखाका एसएसपी राजेन्द्रप्रसाद चौधरीको नेतृत्वमा ५ सदस्यीय छानबिन समिति गठन भएको हो ।

उक्त समितिले घटनाको छानबिन गरेर प्रहरी प्रधान कार्यालयलाई प्रतिवेदन बुझाउने प्रदेश प्रहरी प्रमुख डीआईजी अरुण विसीले जानकारी दिए ।

आइतवार मोरङको लेटाङ नगरपालिका–५, खेरुवास्थित शिक्षा विकास माविमा स्थानीय र प्रहरीबीच झडप हुँदा एक प्रहरी जवानको मृत्यु भएको थियो भने २५ जना घाइते भएका थिए ।

विद्यालयका ५६ वर्षीय शिक्षकले कक्षा ७ मा अध्ययनरत १४ वर्षीया छात्रालाई होलि खेल्ने क्रममा यौन दुर्व्यवहार गरेको घटना सार्वजनिक भएपछि प्रहरी र स्थानीयवासीबीच झडप भएको थियो । साे क्रममा भएको झडपले उग्र रुप लिँदा प्रहरी जवान उर्मीला श्रेष्ठको ज्यान गएको हो ।