काठमाडौं– चितवन जिल्ला अदालतले गोरखा फुजेलका कृष्णप्रसाद अधिकारीको हत्याका १३ प्रतिवादीमध्ये १२ जनालाई सफाइ दिएसँगै मुख्य आरोपी भनिएका छविलाल पौडेल सोमबार डिल्लीबजार कारागारबाट थुनामुक्त हुने भएका छन् ।
गत असार २४ गते उनले सर्वोच्च अदालतमा आत्मसमर्पण गरेका पौडेलले आइतबार सफाइ पाएपछि सोमबार रिहा हुने भएका हुन् । उनी पुर्पक्षका लागि थुनामा थिए।
पौडेल जेलमुक्त हुँदा उनलाई स्वागत गर्न नेकपाका अध्यक्ष पुष्पकमल दाहाल ‘प्रचण्ड’ आफैं जाने कार्यक्रम तय भएको प्रचण्ड सचिवालयले जानकारी दिएको छ। प्रचण्ड सोमबार बिहान ७ बजे डिल्लीबजार कारागार जानेछन्।
अधिकारीको हत्या अभियोगमा सर्वोच्चले छविलाललाई २०७२ पुस ६ गते पुर्पक्षका लागि थुनामै राखेर मुद्दाको कारबाही अघि बढाउन आदेश गरेको थियो। अधिकारीको २०६१ साल जेठ २४ मा हत्या भएको थियो ।
छोराका हत्यारालाई कारवाही नहुँदासम्म अनशन नतोड्ने अडानमा रहेका मृतक कृष्णका बाबु नन्दप्रसाद अधिकारीको पनि अनशनका क्रममा निधन भएको छ । आमा गंगामायाले भने केही महिनाअघि मात्र अनशन तोडेकी थिइन् ।
प्रतिक्रिया