काठमाण्डु – काठमाण्डु महानगरपालिकाका मेयर बालेन्द्र शाहविरुद्ध अनौठो आन्दोलन सुरु भएको छ ।

सामाजिक अभियन्ता इशान श्रेष्ठ ‘ईः’ले मेयर शाहविरुद्ध ७७ घण्टा उभिएर गरिने आन्दोलन थालेका छन् ।

श्रेष्ठले मेयर शाहको कार्यालय राष्ट्रिय सभागृह अगाडि ७७ घण्टासम्म उभिएर विरोध प्रदर्शन गर्ने जनाएका छन् ।

मंगलबार दिउँसो १ बजेदेखि राष्ट्रिय सभागृह अगाडि उभिएका श्रेष्ठले आन्दोलन शुक्रबार ६ बजेसम्म जारी रहने बताए ।

सडकमा व्यापार गर्ने बिक्रेताका लागि वैकल्पिक व्यवस्था नगरी धरपकड गरिएको विरोधमा आन्दोलन गर्नुपरेको उनले बताए । फुटपाथ व्यापारीलाई वैकल्पिक व्यवस्थापन गर्नुपर्ने उनको माग छ ।