काठमाण्डु-प्रधानमन्त्री केपी शर्मा ओलीको तय भएको चीन भ्रमणअघि परराष्ट्रमन्त्री आरजु राणा देउवाले बेइजिङ भ्रमणमा जाने भएकी छिन् । प्रधानमन्त्रीको भ्रमणको एजेण्डा र कार्यक्रम टुङ्गो लगाउन परराष्ट्रमन्त्री राणा चीन जान लागेकी हुन् ।

प्रधानमन्त्री ओली आफ्ना चिनियाँ समकक्षी ली छ्याङको निमन्त्रणामा डिसेम्बर २ देखि ६ सम्म चीनको पाँचदिने औपचारिक भ्रमण गर्ने कार्यक्रम छ । यद्यपी यसको औपचारिक घोषणा हुन बाँकी छ ।

प्रधानमन्त्रीको भ्रमणको एजेन्डा, कार्यक्रम र आधार तयार गर्न परराष्ट्रमन्त्री राणा नोभेम्बर २९ मा चीनको भ्रमण गर्नेछिन् । भ्रमणका क्रममा उनले आफ्ना समकक्षी वाङ यी र चिनियाँ कम्युनिष्ट पार्टीका अन्य वरिष्ठ अधिकारी र नेताहरूसँग भेटघाट गर्ने कार्यक्रम छ ।

त्यसपछि उनी बेइजिङमा प्रधानमन्त्रीको प्रतिनिधिमण्डलमा सहभागी हुनेछिन् । चिनियाँ पक्षले यसअघि नै परराष्ट्रमन्त्री देउवालाई प्रधानमन्त्री ओलीको चीन भ्रमणका लागि निमन्त्रणा दिएको थियो ।

गत सेप्टेम्बरमा न्यूयोर्कमा संयुक्त राष्ट्र महासभाको साइडलाइन भेटमा चिनियाँ विदेशमन्त्री वाङ यीले मन्त्री राणालाई चीन भ्रमणको निमन्त्रणा गरेका थिए । नेपाली कांग्रेस र एमालेको दुई दलीय राजनीतिक संयन्त्रले पनि प्रधानमन्त्रीको भ्रमणको पूर्व तयारीको जिम्मा परराष्ट्रमन्त्री राणालाई दिएको छ ।

प्रधानमन्त्रीको भ्रमणको तयारी गर्ने जिम्मा पाएपछि मन्त्री राणाले सरोकारवालाहरूसँग पटक-पटक छलपल गरेकी हुन् ।।

मङ्गलबार उनले सम्बन्धित मन्त्रालयका अधिकारीहरूसँग नेपाल-चीन सम्बन्धका विभिन्न पक्ष, नेपालमा चिनियाँ लगानीमा सञ्चालित आयोजनाको अवस्था, सहयोगका सम्भावित क्षेत्र र प्रधानमन्त्रीको भ्रमणका क्रममा अगाडि बढ्ने थप अवसरका बारेमा छलफल गरेकी हुन् । छलफलमा मन्त्री राणाले भ्रमणका क्रममा अगाडि बढ्न सक्ने सम्भाव्य आयोजनाको सूची तयार गर्न निर्देशन दिइन् ।

बेल्ट एन्ड रोड इनिसिएटिभ (बीआरआई) कार्यान्वयन योजनामा हस्ताक्षर र यसको फ्रेमवर्क अन्तर्गत केही नयाँ परियोजनाहरूको कार्यान्वयन गर्ने र कम्तीमा एउटा ठुलो पूर्वाधार परियोजना कार्यान्वयन गर्ने लगायतका विषय प्रधानमन्त्रीको चीन भ्रमणका सम्भावित एजेन्डा हुन् ।

यस्तै पोखरा अन्तर्राष्ट्रिय विमानस्थलका लागि नेपालले चीनको एक्सिम बैंकसँग लिएको ऋण मिनाहा गराउने विषय पनि प्रधानमन्त्रीको भ्रमणको एजेन्डा रहेको छ ।