काठमाण्डु – प्रधानमन्त्री केपी शर्मा ओलीले कमलादीस्थित स्काइ वाक टावरको भ्रमण र अवलोकन गरेका छन् ।

बुधबार सार्वजनिक बिदाको दिन पारेर प्रथम महिला राधिका शाक्यसहित अवलोकनमा निस्किएका हुन् ।

टावरले हरेक महिना पर्यटकका रूपमा अतिविशिष्ट र विशिष्ट व्यक्तिहरूलाई आमन्त्रण गर्ने शृंखलाको थालनीका क्रममा प्रधानमन्त्री ओली बुधबार त्यहाँ पुगी टावरको उचाइमा राष्ट्रिय झण्डोत्तलन गरे ।

सो क्रममा संक्षिप्त प्रतिक्रिया दिँदै प्रधानमन्त्री ओलीले टावरहरूको उपयोगिता छैन भन्ने कुरालाई गतिलो खण्डन गर्न स्काइ टावर उदाहरण भएको बताए । उनले यस्ता टावरमा ज्येष्ठ नागरिक र बालबालिकासहित पर्यटकहरूलाई फुर्सदको समयमा घुमफिर, दृश्यावलोकन र मनोरञ्जनका लागि उपयोगी सावित हुने विश्वास व्यक्त गरे ।

काठमाण्डुको मध्यभागमा रहेको २५६ फिट उचाइको टावर निजी क्षेत्रको लगानीमा सञ्चालनमा आएको छ ।