काठमाण्डु– अमेरिकी सरकारले थप ७५ जना नेपाली नागरिकलाई नेपाल फिर्ता पठाएको छ। चार्टर्ड विमानमार्फत बिहीबार उनीहरू त्रिभुवन अन्तर्राष्ट्रिय विमानस्थलमा आइपुगेका हुन्। डिपोर्ट हुनेमध्ये तीन जना महिला छन्।

नेपाल आइपुगेपछि उनीहरूलाई प्रहरीको मानव बेचबिखन अनुसन्धान ब्युरोले सोधपुछ गरेको छ। ब्युरोका अनुसार फर्काइएकामध्ये दुई जना भिजिट भिसामा अमेरिका पुगेका थिए भने अधिकांश ‘तल्लो बाटो’ प्रयोग गरेर त्यहाँ प्रवेश गरेका थिए।

ब्युरो प्रमुख तथा एसएसपी कृष्ण पंगेनीका अनुसार तल्लो बाटोबाट अमेरिका पुग्न न्यूनतम २० लाख रुपैयाँदेखि अधिकतम १ करोड रुपैयाँसम्म खर्च भएको पाइएको छ।

फर्काइएकामध्ये एक जना व्यक्ति भने करिब ३० वर्षसम्म अमेरिका बसेको खुलेको छ।

डिपोर्ट हुनु अघि उनीहरूलाई करिब सात महिनासम्म हिरासतमा राखिएको प्रहरीले जनाएको छ।

प्रहरी तथ्यांकअनुसार पछिल्ला सात वर्षमा ६६६ जना नेपाली नागरिक अमेरिका बाट फर्काइएका छन्। तीमध्ये अधिकांश डोनाल्ड ट्रम्प अमेरिकी राष्ट्रपति निर्वाचित भएपछि डिपोर्ट गरिएको देखिन्छ। ट्रम्प प्रशासनपछि मात्रै ४०९ पुरुष र ३० महिलालाई नेपाल फिर्ता पठाइएको प्रहरीले जनाएको छ।