काठमाण्डु- सरकारलाई तिर्नुपर्ने रकम नतिरेका ५२ जनाको तीनपुस्ते विवरण सार्वजनिक गरिएको छ ।

तीनपुस्ते विवरण सार्वजनिक भएकामा महादेव खिम्ति निर्माणसेवाका रवि सिंह, दि फूलबारी लिमिटेड पोखराका पियुष बहादुर अमात्यदेखि कर्मचारी, कृषि व्यवसायी, सशस्त्र प्रहरीसहित ५२ जना छन् ।

महालेखा नियन्त्रक कार्यालय, कुमारीचोक तथा केन्द्रीय तहसिल कार्यालय बबरमहल काठमाण्डुले आइतबार सरकारी बाँकी रकम तिर्न आउने सम्बन्धी सूचना सार्वजनिक गरेको हो । विगतमा पनि पटकपटक सार्वजनिक सूचना प्रकाशित गरिएको तर बाँकी रकम नबुझाएको हुँदा बाध्य भएर तीनपुस्ते विवरण सार्वजनिक गरिएको सूचनामा उल्लेख छ ।

सूचना प्रकाशित भएको मितिले ३५ दिनभित्र कार्यालयमा सम्पर्क राखी बुझाउनुपर्ने रकम बुझाउन र नबुझाएमा चलअचल सम्पत्ति दाबी गरी कानून अनुसार असुल उपर गरिने भनिएको छ ।