काठमाण्डु – नेपाली कांग्रेसका नेता डा. मीनेन्द्र रिजालले राष्ट्रिय स्वतन्त्र पार्टी (रास्वपा) उपसभापति डीपी अर्यालको अभिव्यक्तिप्रति असन्तुष्टि जनाएका छन् ।

मंगलबार पार्टीका सांसदहरूसँगको अभिमुखीकरण कार्यक्रमलाई सम्बोधन गर्दै उपसभापति अर्यालले अर्को चुनावपछि प्रतिपक्षविहीन संसद् हुने गरी काम गर्नुपर्छ भनेर दिएको अभिव्यक्ति चिन्ताजनक रहेको धारणा राखे ।

उनले भने, ‘यो सरकार ठीकसँग चल्यो भने त ठीकै छ तर भर्खरै एउटा अभिव्यक्ति सुन्दै थिएँ, अर्कोपल्ट विपक्ष नै नरहने गरी जनताले भोट हाल्ने अवस्था पुर्‍याउनुपर्छ भन्ने सुनें । उहाँले काम गर्नुहोस्, सफल हुनुहोस् तर विपक्ष नै नरहने गरी दिएको अभिव्यक्ति चाहिँ चिन्ताजनक छ ।’

उनले संसद्मा विपक्ष नरहने सोचले पुरानो ठाउँबाट ‘ब्रेक’ नपाउने बताए ।

पुराना दलहरूलाई आफ्नै आन्तरिक बोझले थिचेको भन्दै त्यो बन्धनबाट मुक्त गर्ने काम रास्वपाले गर्‍यो भने जनताले दिएको मतको सम्मान हुन्छ कि हुँदैन भन्ने विषय पेचिलो रहेको बताए ।

‘भोट दिऊन् भन्ने कुरा एउटा होला । अझ फराकिलो मतबाट जिताउनु भन्ने कुरा अर्को होला । तर विपक्ष नै नरहने समाजको परिकल्पना गर्ने सोचचाहिँ रहिराख्यो भने राजनीतिले पुरानो ठाउँबाट ब्रेक पाउँदैन भन्ने लाग्छ मलाई,’ उनले भने, ‘किनकि हामी हाम्रो आफ्नै आन्तरिक बोझले थिचेको पार्टी हो ।’

उनले भने, ‘हाम्रा पत्रकार छन्, शिक्षक छन्, विद्यार्थी छन्, तरुण छन् । संस्था नै संस्था छन् हाम्रो । चुनावमा जाँदाखेरि पनि सबभन्दा चित्त बुझाउन नसक्ने यस्तै संस्थाका साथीहरू भए । यो मन्त्री हुँदो यो पाएको थियो, त्यो मन्त्री हुँदा यो पाएको थियो भन्ने सोचमा ग्रस्त छन् । अनि अहिले किन तपाईंलाई भोट हाल्ने भनेर प्रश्न गर्नुहुन्छ । त्यो बन्धनबाट मुक्त गर्ने काम रास्वपाले गर्‍यो भने जनताले दिएको मतको पहिलो उपलब्धि हुनेछ ।’