काठमाण्डु – नेपाल चेम्बर अफ कमर्सका अध्यक्ष कमलेश कुमार अग्रवालले नेपालको अर्थतन्त्र अत्यन्तै अस्थिर (भोलाटाइल) अवस्थामा पुगेको बताएका छन् ।

नेपाल व्यापार संघको ३३औँ वार्षिक साधारणसभा तथा १७औँ अधिवेशनलाई सम्बोधन गर्दै अध्यक्ष अग्रवालले अर्थतन्त्र सिथिल रहेको उल्लेख गरे ।

उनले आर्थिक वर्ष २०८१/८२ मा ४.४ प्रतिशत आर्थिक वृद्धिदर प्रक्षेपण गरिएको भए पनि कोभिड १९ को नकारात्मक प्रभाव तथा त्यसपछिको कुशल व्यवस्थापनको अभावका कारण स्थिति बिग्रिएको बताए ।

उनले भने, ‘नेपालको अर्थतन्त्र अत्यन्तै अस्थिर (भोलाटाइल) भएर गएको अवस्था छ । अर्थतन्त्र शिथिल छ । अर्थतन्त्रको आर्थिक वृद्धिदर ८१–८२ मा ४.४ प्रक्षेपण गरिने थियो । तर कोभिड १९ को नकारात्मक प्रभाव र त्यसपछिको कुशल व्यवस्थापनको अभावले नै भदौ २३ र २४ गते जेनजी आन्दोलन हुन गयो । आन्दोलनको क्रममा निजी क्षेत्रका औद्योगिक व्यावसायिक प्रतिष्ठानहरूको झण्डै ८० अर्ब जतिको क्षति भयो । समग्र व्यवसायी औद्योगिक वातावरणमा नकारात्मक असर पर्न पुग्यो । निजी क्षेत्रको मनोबल अत्यन्त न्यून हुन गयो ।’

उनका अनुसार भदौ २३ र २४ गते भएको जेनजी आन्दोलनका क्रममा निजी क्षेत्रका औद्योगिक तथा व्यावसायिक प्रतिष्ठानहरूमा करीब ८० अर्ब रुपैयाँ बराबरको क्षति भएको थियो । यसले समग्र व्यावसायिक तथा औद्योगिक वातावरणमा नकारात्मक असर पारेको र निजी क्षेत्रको मनोबल अत्यन्त न्यून भएको उनले बताए ।

अध्यक्ष अग्रवालले अपार प्राकृतिक स्रोतले सम्पन्न देश भए पनि राजनीतिक तथा आर्थिक नीतिगत स्थायित्वको अभावले आर्थिक समृद्धि हासिल गर्न नसकिएको उल्लेख गरे । युवा जनशक्तिका लागि पर्याप्त रोजगारी सिर्जना गर्न नसकिएको पनि उनले बताए ।

उनले भने, ‘अपार प्राकृतिक स्रोतले भरिएको हाम्रो देशमा राजनीतिक स्थायित्व, अर्थ नीतिको स्थायित्वको अभावले देशको आर्थिक समृद्धि त परै जाओस्, हाम्रो युवा जनशक्तिलाई हामीले रोजगारी सिर्जना गर्न समेत सकिएन ।’

उनले दैनिक २५ सयभन्दा बढी युवाहरू रोजगारीको अभावमा विदेशिनुपर्ने बाध्यता रहेको बताए । जुन युवाहरूमा बढ्दो असन्तुष्टिको प्रमुख कारण बनेको र यही असन्तुष्टि जेनजी आन्दोलनको मुख्य कारण समेत रहेको उनले बताए ।

उनले भने, ‘प्रतिदिन २ हजार ५०० भन्दा बढी युवाहरू स्वदेशमा रोजगारीको अभावले विदेशिनुपर्ने बाध्यता नै युवाहरूमा देखिएको असन्तुष्टिको मूल कारण समेत जेनजी आन्दोलन थियो ।’

अग्रवालले जेनजी पुस्ताले अघि सारेका सुशासन, भ्रष्टाचार नियन्त्रण, रोजगारी सिर्जना र आर्थिक समृद्धिका मागहरूलाई महत्त्वपूर्ण ठहर गर्दै यी विषयहरू देशको विकासका आधारस्तम्भ भएको उल्लेख गरे । उनले सुशासनलाई युवाहरूको भविष्यप्रतिको भरोसाको रूपमा व्याख्या गर्दै भ्रष्टाचार उन्मूलन तथा विदेशमा हासिल गरेका अनुभवलाई स्वदेशमै सकारात्मक रूपमा प्रयोग गर्नुपर्नेमा जोड दिए ।

‘जेनजी पुस्ताले अघि सारेका मागहरू सुशासन, भ्रष्टाचार निवारण र रोजगारी सिर्जना, आर्थिक समृद्धिको पहिलो खुड्किलो हुन् । सुशासन युवाहरूको भविष्यप्रतिको भरोसा हो । भ्रष्टाचार उन्मुलन र विदेशमा हासिल गरेको अनुभवलाई यहाँ हामीले सकारात्मक रूपमा प्रयोग गर्न आवश्यक छ,’ उनले भने ।

उनले जेनजी आन्दोलनपछि नेपाल राजनीतिक रूपमा संवेदनशील मोडमा पुगेको बताए । तर हालै सम्पन्न निर्वाचनको परिणामले आशा जगाएको उल्लेख गर्दै आगामी सरकारले निजी क्षेत्रको सुरक्षा सुनिश्चित गर्नुपर्ने माग गरेका छन् ।

उनले भने, ‘जेनजी आन्दोलनपछि नेपालको राजनीतिक संवेदनशील मोडमा पुगिसकेको थियो । तर हालै सम्पन्न निर्वाचनको परिणामले ठूलो आशाको संञ्चार गरेको छ । आगामी सरकारले निजी क्षेत्रको सुरक्षाको प्रत्याभूति दिन माग गर्दछौँ ।’