काठमाण्डु – नेकपा एमालेका महासचिव शंकर पोखरेलले २०८२ भदौ २३ र २४ गते भएको जेनजी आन्दोलनमा षड्यन्त्र गरिएको बताएका छन् ।

नेकपा स्थापना दिवसको अवसरमा बुधबार च्यासलमा आयोजित कार्यक्रममा बोल्दै उनले भदौ २४ गते षड्यन्त्रपूर्वक विध्वंस मच्चाइएको बताएका हुन् ।

उनले यस विषयमा पार्टीको धारणा जनतामाझ स्थापित गर्न नसक्दा हालको परिणाम आएको बताए । उनले निर्वाचनमा सफलता हासिल गर्ने पक्षलाई बधाई दिँदै जनादेशको सम्मान गरेको उल्लेख गरे ।

उनले भने, ‘गत भदौ २३ र २४ गते भएको जेनजी आन्दोलनमा षड्यन्त्र थियो र त्यहीँ षड्यन्त्रको जगमा २४ गते विध्वंश मच्चाइयो भन्ने हाम्रो पार्टीको जे मान्यता थियो, त्यो मान्यतालाई हामीले जनताकाबिच स्थापित गर्न नसक्दा नै आजको यो परिणाम व्यहोरेका छौं । आज जसले सफलता हासिल गरेका छन्, हामीले जनताको जनाआदेशलाई सम्मान गरेका छौं । जसले सफलता हासिल गरेका छन्, उनीहरूलाई बधाई दिएका छौं । जनताका भावनालाई जनादेशका आधारमा काम गरून् भनेर शुभकामना पनि दिएका छौं ।’

पोखरेलले छोटो समयमै सार्वजनिक भइरहेका घटनाक्रमहरूले आफ्नो पार्टीले व्यक्त गरेका आशंका सही साबित हुँदै गएको दाबी गरे । सुशासन कायम गर्न नसकेको आरोपबारे बोल्दै उनले एमालेका नेता तथा कार्यकर्ताको सम्पत्ति जाँच गर्न र हाल सरकारमा रहेका नेताहरूको सम्पत्तिको पनि छानबिन गर्नुपर्ने बताए ।

उनले तथ्यले एमालेका नेता–कार्यकर्ता इमान्दार रहेको देखाउने दाबी गर्दै पार्टीमाथि विभिन्न आरोप लगाएर जनतामाझ बदनाम गर्ने प्रयास भइरहेको आरोप लगाए । गलत सूचना र प्रविधिको दुरुपयोगमार्फत जनमत प्रभावित पारिएको कारण एमाले जनताबाट टाढिएको उनको भनाइ थियो ।

उनले भने, ‘छोटो समयमा नै दृश्यहरू जसरी नै बाहिर आउँदैछन्, हामीले गरेका आशंकाहरू सही प्रमाणित हुँदैछन् । सुशासन कायम गर्न नसकेको आरोप लगाइयो, लामो समयसम्म सत्तामा रहेका हाम्रा नेताहरूका सम्पत्तिहरू जाँचबुझ गरौं । अहिले सरकारमा रहेका नेताका सम्पत्तिहरू जो सार्वजनिक भएका छन्, तिनीहरूको जाँचबुझ गरौं त ! सुशासनका मामिलामा नेकपा एमालेका नेता कार्यकर्ता जतिको इमान भएका नेता कार्यकर्ताहरू अरु कसैको छैन भन्ने कुरा तथ्यले बताउँछ । तर पनि आज जनताका सामु हामीलाई अनेक प्रकारले लाञ्छित गर्ने काम भइरहेको छ । आज जनता हाम्रो विपक्षमा किन गए भन्दा यसप्रकारको गलत सूचनाका कारणले आज सूचनामा, प्रविधिमा एक प्रकारको दुरुपयोगको तरिकाका माध्यमबाट जनताको मनोविज्ञानलाई प्रभावित गर्ने तरिकाबाट जुन दृष्टिकोण तयार गर्ने काम भयो, त्यो कारणले गर्दाखेरी जनमत हामीबाट टाढिएको आवस्था छ ।’