काठमाण्डु– मौसम पूर्वानुमान महाशाखाले आज (बुधबार) देशका धेरै जिल्लामा तीव्र वेगको हुरी आउने सम्भावना रहेको बताएको छ ।

विभागले आज बिहान ८ बजे अर्को बुुलेटिन जारी गर्दै अपराह्न चार बजेबाट ६ प्रदेशका विभिन्न जिल्लामा हावाहुरी चल्न सुरु हुने जानकारी दिएको हो ।

हावाहुरीको प्रभाव पर्ने प्रदेश र जिल्लाहरु

–सुदूरपश्चिम प्रदेशका कञ्चनपुर, डडेलधुरा र डोटीसहित आसपासका जिल्लामा

–लुम्बिनी प्रदेशका बर्दिया, बाँके, दाङ, अर्घाखाँची, परासीसहित आसपासका जिल्लामा

–गण्डकी प्रदेशको नवलपुर र आसपासका जिल्लामा

–बागमती प्रदेशको चितवन आसपासका जिल्लामा

–मधेश प्रदेशका बारा, पर्सा र धनुषासहित आसपासका जिल्लामा

–कोशी प्रदेशका झापा र मोरङसहित आसपासका जिल्लामा

मौसम विभागले आज अपराह्न ४ बजे सुरु हुने तीव्र गतिको हावाहुरी भोलि बिहान ६ः४५ बजे चल्ने जनाएको छ ।विभागका अनुसार हावाहुरीसँगै मेघगर्जन, चट्याङ सहित असिना पानी पर्ने प्रणाली पनि पश्चिमबाट पूर्वतिर सर्दै जाने सम्भावना छ ।

यसै विषयमा राष्ट्रिय विपद् जोखिम न्यूनीकरण तथा व्यवस्थापन प्राधिकरणले पनि सतर्कता सूचना जारी गरेको छ।

तीव्र हुरीका कारण रुख ढल्ने, कमजोर संरचना ढल्ने, छाना उड्ने, विद्युत् तथा सञ्चार सेवा प्रभावित हुनेलगायतका जोखिम रहने प्राधिकरणले जनाएको छ।

तसर्थ ती स्थानमा रहने वा उक्त समयावधिमा त्यहाँ जाने सबैले सावधानी अपनाउन जरुरी रहेको जनाउँदै प्राधिकरणले दिएका सुझाव यस्ता छन् ।

–सकेसम्म घरबाहिर हिँडडुल नगर्ने

–घरको झ्यालढोका राम्रोसँग बन्द गर्ने

–जस्तालगायतबाट बनेको छानो कमजोर छ भने बन्धन बलियो बनाउने

–घरबाहिर आगो नबाल्ने, घरभित्र पनि आगो बाल्दा सावधानी अपनाउने

–लड्न सक्ने कमजोर संरचना, अग्ला रुख, खम्बा नजिक र बिजुलीको तारमुनि नबस्ने

–बिजुलीको तार लत्रिएको छ भने नछुने

–उडाएर आएको सामानबाट चोट लाग्ने जोखिम हुने भएकाले चनाखो रहने