काठमाण्डु– एसियन गेम्स मेन्स क्वालिफायरको उपाधि नेपालले हात पारेको छ।

भर्खरै सिंगापुरस्थित सिंगा ओभल मैदानमा सम्पन्न फाइनल खेलमा नेपालले हङकङलाई डीएलएस मेथडमा १९ रनले हराएको हो।

१८९ रनको लक्ष्य पाएको नेपालले ११.३ ओभरमा २ विकेट गुमाएर ११४ रन जोडेपछि पानी परेको थियो । त्यसपछि डीएलएस मेथडमा नेपाल विजयी बनेको हो।

नेपालका लागि कुशल भुर्तेलले ६५ , रोहित पौडेल ३५ रन, दिपेन्द्र ऐरीले ४ रन जोडे । यस्तै हङकङका लागि आयुस शुक्ला र इसान खानले एक एक विकेट लिए ।

यसअघि टस हारेर ब्याटिङ थालेको हङकङले २० ओभरमा ७ विकेट गुमाएर १८८ रन जोड्यो।

हङकङका लागि अंशुमान रथले सर्वाधिक ८० रन, शाहिद वसिफले ५५ तथा शिव माथुरले २६ रन जोड्दा अन्य ब्याट्सम्यानले दोहोरो अंकमा रन बनाउन सकेनन्।

बलिङतर्फ नेपालका शेर मल्लले ४ विकेट लिँदा करण केसीले २ तथा सन्दीप लामिछानेले एक विकेट लिए।

एसियाली खेलकुद छनोटबाट नेपालसँगै हङकङ, मलेसिया र ओमानले जापानमा हुने २०औँ एसियाली खेलकुद २०२६ मा स्थान पक्का गरिसकेका छन्।