काठमाण्डु – सोमवार गएको शक्तिशाली भूकम्पपछि कोलम्बियामा उद्धारकर्मीहरू भवन र भग्नावशेषमा फसेका मानिसहरूको उद्धारमा जुटेका छन्।

अहिलेसम्म २५०  भन्दा बढी मानिसको मृत्यु भएको पुष्टि भएको छ। तीमध्ये अधिकांश काली र पेरेरा सहरका छन्।

सोमवार बिहान सान होसे डेल पाल्मारलाई केन्द्रबिन्दु बनाएर ७.४ म्याग्निट्यूडको भूकम्प आएको थियो। भूकम्पको धक्का सयौँ माइल टाढाका छिमेकी देशहरू भेनेजुएला, एक्वडर र पनामासम्म महसुस भएको थियो। मङ्गलवारसम्म पनि लगातार परकम्पहरू महसुस भइरहेका थिए।

राष्ट्रपति एबएलार्दो डेला एस्प्रीएयाले देशमा राष्ट्रिय विपद्को घोषणा गरेका छन्। सबैभन्दा बढी प्रभावित सहरमध्ये पेरेराको अवस्था सार्वजनिक गर्दै मङ्गलवार उनले ज्यान गुमाउनेबाहेक करिब २,६०० जना घाइते भएका र झन्डै २०० जना हराइरहेका बताए।

उनका अनुसार १,१०० भन्दा बढी घर पूर्ण रूपमा ध्वस्त भएका छन् भने ८,००० भन्दा बढी घरमा क्षति पुगेको छ। सोमवार रातिदेखि मङ्गलवार बिहानसम्म पेरेरा र कालीजस्ता सहरमा धेरै मानिसले घरबाहिरै रात बिताए। कतिपयका घर ध्वस्त भएका थिए भने कतिपय घर भत्किने डरका कारण बाहिर बसेका थिए।

२२ लाख जनसङ्ख्या रहेको काली सहरमा ९५ जनाको मृत्यु भएको छ। उद्धार कार्यलाई समन्वय गर्न एउटा एकीकृत कमान्ड पोस्ट स्थापना गरिएको छ।

सहरको एउटा अस्पतालको माथिल्ला केही तला भत्किँदा बिरामीहरू समेत भित्रै फसेका छन्। उक्त सहरको उत्तरी क्षेत्रमा पर्ने कालिमामा रहेको एउटा विद्यालय भत्किँदा चार बालबालिकाको मृत्यु भएको छ।

लुटपाटको सम्भावित जोखिमलाई नियन्त्रण गर्न उक्त क्षेत्रमा कर्फ्यू लगाइएको छ। कालीमा मङ्गलवार भूकम्पका थप कम्पनहरू महसुस भएको छ । कोलम्बियाको भौगर्भिक सेवाका अनुसार सोमवारको भूकम्पपछि देशभर ७० भन्दा बढी परकम्प गएका छन्।

सयौँ स्वयंसेवकहरू भग्नावशेष हटाउन र त्यसमा फसेकाहरूको उद्धारका निम्ति जुटिरहेका छन्। राष्ट्रपतिमा निर्वाचित एस्प्रिएयालाई चुनावमा समर्थन गरेको डोनल्ड ट्रम्प प्रशासनले कोलम्बियालाई १ करोड ५५ लाख अमेरिकी डलर सहयोगको घोषणा गरेको छ। एक्वडर, ब्रजिल, एल साल्भाडोर र भेनेजुएलाबाट पनि सहयोगका प्रस्तावहरू आएका छन्।