काठमाण्डु –भूमि व्यवस्था, सहकारी, सङ्घीय मामिला तथा सामान्य प्रशासनमन्त्री प्रतिभा रावलले भूमिसम्बन्धी समस्या समाधानका लागि तीनै तहका सरकार जिम्मेवार हुनुपर्ने बताएकी छन् ।

कञ्चनपुरको दोधारा चाँदनी नगरपालिकामा आज आयोजित कार्यक्रममा उनले भूमिसम्बन्धी समस्या समाधान उच्च प्राथमिकतामा राखेर सरकारले काम गरिरहेको स्पष्ट पार्दै प्रदेश र स्थानीय सरकारबाट सोहीअनुरूपको सहयोग हुनुपर्ने बताइन् ।

मन्त्री रावलले भनिन्, ‘एउटा सरकारले सहयोग नगर्दा पुरै पालिकामा सुकुम्बासीको लालपूर्जा वितरण रोकिन सक्छ ।’ उनले पालिकामा देखिएका समस्या समाधानका लागि नीतिगत सुधारका लागि छलफल भएको बताइन् । ‘पीडितका समस्याहरू समयमै जानकारीमा आएको भए अहिलेसम्म समाधानमा गइसकेको हुन्थ्यो’, उनले भनिन्, ‘पीडितका हकमा जुनुसुकै दलमा आस्था राख्ने भए पनि हामी एक ठाउँमा हुनुपर्छ ।’ उनले पीडितको न्योयोचित सम्बोधन हुने कुरामा ढुक्क हुन आग्रह गरिन् ।

मन्त्री रावलले आज जिल्ला प्रशासन कार्यालय कञ्चनपुरमा भूमि प्रशासन कार्यालय, नापी कार्यालयलगायत पालिकाका प्रमुखहरू भूमिसम्बन्धी समस्या समाधानका लागि छलफल गरेकी थिइन् । उनले महेन्द्रनगरस्थित निर्माणाधिन अवस्थामा रहेको मझगाउँ विमानस्थल र दोधारा चाँदनीस्थित सुक्खा बन्दरगाहको स्थलगत अवलोकन गरेकी छन् ।

यस्तै उनले ५०० दिनभित्र सुकुम्बासीलाई लालपूर्जा दिने बताइन् ।

सँगसँगै सहकारी पीडितका पनि समस्या छन्, त्यसमा पनि हामी काम गरिरहेका छौँ । नेपाल सरकारको प्राथमिकतामा रहेको विषय हो सुकुम्बासीको समस्या । त्यही भएर हामीले यो सरकारको पालामा, ५०० दिनभित्र सुकुम्बासीको समस्या हामीले समाधान गर्नेछौँ देशैभरिको हकमा । त्यसैले हजुरहरू पनि केही नडराउनुस्, नआत्तिनुस् ।