काठमाण्डु – प्रधानमन्त्री बालेन्द्र शाहले देश अकल्पनीय विपत्तिमा परेका बेला सरकार यथाशीघ्र र यथाशक्य उद्धार तथा राहत कार्यमा जुटेको बताएका छन् ।

बिहीबार सामाजिक सञ्जाल फेसबुकमार्फत प्रधानमन्त्री शाहले सिङ्गो देश, विश्वभरका नेपाली र अन्तर्राष्ट्रिय समुदायको सहयोग एवम् सहकार्यमा विपत्तिको मिलेर सामना भइरहेको बताएका छन्।

उनले उद्धारका लागि बिहान साढे ६ बजेदेखि नै उडानहरू सुरु भइसकेको र १५ भन्दा बढी उडान सम्पन्न भएको जनाएका छन्। साथै थप हेलिकोप्टर पनि उडानका लागि तयारी अवस्थामा राखिएको प्रधानमन्त्रीले जानकारी दिएका छन्।

प्रधानमन्त्रीका अनुसार नेपाली सेनाको उद्धार टोलीले रसुवाको टिमुरेबाट ११६ जनालाई सकुशल उद्धार गरेको छ। उद्धार गरिएकामा ९५ नेपाली र २१ भारतीय नागरिक छन्। यसका साथै टनेलबाट सात जना नेपाली नागरिकको सफलतापूर्वक उद्धार गरिएको जानकारी प्रधानमन्त्री शाहले दिएका छन्।

प्रभावित क्षेत्रमा अत्यावश्यक सामग्री द्रुत रूपमा पुर्‍याउने काम भइरहेको पनि प्रधानमान्त्रीले जनाएका छन् ।

‘राहत सामग्रीका साथै जेनेरेटर, पोर्टेबल मोबाइल टावर, मेडिकल सामग्री, टेन्ट र फलाम-ढुङ्गा काट्ने मेसिन पठाइँदैछ। सम्पर्क सहज बनाउन प्रभावित क्षेत्रमा छिट्टै मोबाइल नेटवर्क तथा चार्जिङको अस्थायी व्यवस्था गरिनेछ’, उनले फेसबुकमा लेखेका छन् ।

उनका अनुसार नुवाकोटमा अस्थायी शिविर तयार गरी खाना र पानीको प्रबन्ध मिलाइएको छ भने चुस्त उद्धारका लागि ड्रोन सर्भेमार्फत जानकारी सङ्कलन अन्तिम चरणमा पुगेको छ। हेलिकोप्टरमार्फत उद्धार गर्दा सुरुमा सिकिस्त, वृद्ध, महिला र बालबालिकालाई प्राथमिकता दिइने उनले जनाएका छन् ।

राज्यका सम्पूर्ण संयन्त्र परिचालित भएकाले धैर्य तथा संयम राखी उद्धारको प्रतीक्षा गर्न प्रधानमन्त्रीले अनुरोध गरेका छन्। उनले आशा र विश्वासका साथ सबैलाई एक भएर विपद्को सामना गर्न र हातेमालो गर्न आह्वान समेत गरेका छन्।