काठमाण्डु – ऊर्जा, जलस्रोत तथा सिँचाइ मन्त्रालयले बाढी तथा विपद्बाट प्रभावित नुवाकोट र रसुवा जिल्लामा वैकल्पिक विद्युत् सेवा प्रवाह गर्न ५०० थान सोलार पावर बैंक हस्तान्तरण गरेको छ ।

मन्त्रालयले वैकल्पिक ऊर्जा प्रवर्द्धन केन्द्रमार्फत प्रभावित क्षेत्रमा तत्कालीन विद्युत् आवश्यकतालाई सम्बोधन गर्ने उद्देश्यले सोलार पावर बैंक उपलब्ध गराएको हो ।

विद्युत् आपूर्ति अवरुद्ध भएका क्षेत्रमा प्रयोग गर्न सकिने पावर बैंकबाट मोबाइल फोन चार्ज गर्नुका साथै करिब ४–५ वटा बत्ती बाल्न सकिनेछ ।

विपद्का कारण नियमित विद्युत् सेवा प्रभावित भएका नागरिकलाई अत्यावश्यक सञ्चार तथा प्रकाशको सुविधा उपलब्ध गराउन सोलार पावर बैंक सहयोगी हुने मन्त्रालयले जनाएको छ ।

प्राकृतिक विपद्का बेला प्रभावित नागरिकको दैनिक जीवन सहज बनाउन तत्काल वैकल्पिक ऊर्जा सेवा उपलब्ध गराउने तथा विद्युत् पहुँचलाई निरन्तरता दिने उद्देश्यले यस्तो पहल गरिएको मन्त्रालयको भनाइ छ ।