रसुवा– १० भदौमा आएको भोटेकोशी बाढीका कारण ठूलो क्षति पुगेको रसुवाको लाङटाङ खोला जलविद्युत् आयोजनामा बेपत्ता भएकाको खोजीका लागि अपनाइएका सबै सम्भावित विकल्पबाट थप सफलता हात नलागेपछि कम्पनीले खोजी अभियान रोकेको छ ।

२० मेगावाट क्षमताको आयोजनामा बाढी आउँदा कार्यरत ६० जना सम्पर्कविहीन भएका थिए । १९ जनाको जीवितै उद्धार भएको थियो । खोजी तथा उद्धारका क्रममा बिहीबार सुरुङभित्रबाट थप दुई जनाको शव भेटिएको थियो ।

बाढीपछि सम्पर्कविहीन भएका ४१ जनामध्ये ३९ जनाको अवस्था अझै अज्ञात छ । कम्पनीका अनुसार उनीहरूको खोजीका लागि सुरुङको प्रत्यक्ष प्रवेशमार्गदेखि वैकल्पिक प्राविधिक पहुँचसम्म प्रयोग गरिएको थियो ।

उद्धारका लागि कम्पनीको प्राविधिक टोलीले पेनस्टक पाइप काटेर बाटो बनाएपछि नेपाली सेना, सशस्त्र प्रहरी र प्रहरीको उद्धार टोली करिब १ सय ५० मिटर लामो सुरुङका अन्तिमसम्म बिन्दुसम्म पुगेको थियो ।

सोही क्रममा दुई जनाको शव भेटिएको हो । थप व्यक्ति फेला पर्न सक्ने सम्भावना नदेखेपछि उद्धार रोकिएको कम्पनीले जनाएको छ ।

आयोजना प्रवर्द्धक तथा निर्माण कम्पनी मल्टी इनर्जी डेभलपमेन्ट प्रालिका प्रबन्ध निर्देशक विजयमोहन भट्टराईले उद्धारका क्रममा सुरक्षाकर्मी र प्राविधिक टोलीले सम्भव सबै प्रयास गरेको बताए ।

‘सुरुङभित्र पुग्न सबै प्रयास गरियो । तर, अब बेपत्ता भएका हाम्रा थप मानिस भेट्ने सम्भावना छैन भन्ने प्रविधिक विश्लेषणपछि हामीले टिमलाई बाहिर निकाल्यौं ।’

भट्टराईले कठिन र चुनौतीपूर्ण खोज तथा उद्धार कार्यमा खटिने नेपाली सेना, सशस्त्र प्रहरी र नेपाल प्रहरीका उद्धारकर्मीको प्रशंसा गरे ।

भट्टराई स्वतन्त्र ऊर्जा उत्पादकहरूको संस्था नेपाल (इप्पान) का सचिवसमेत हुन् ।

भट्टराईले बेपत्ता कामदारका परिवारलाई खोज तथा उद्धारका लागि भएका प्रयास तथा उनीहरुलाई फेला पार्न नसकिने निस्कर्षबारे जानकारी गराइएको पनि बताए ।

‘जति पनि हाम्रा साथीहरु बेपत्ता हुनुभएको छ, उहाँहरुका परिवारलाई हामीले अत्यन्तै दुःख र भारी मनका साथ अब भेटिने सम्भावना नरेहको जानकारी गरायौं’, भट्टराईले काठमाण्डु पाटीसँग भने ।