काठमाण्डु– सत्तारुढ राष्ट्रिय स्वतनत्र पार्टी (रास्वपा) सभापति रवि लामिछाने र अमेरिकी विदेशमन्त्री मार्को रुबिओबीच फोन संवाद भएको छ ।

लमिछानेको सचिवालयले सोमबार उनीहरुबीच फोन संवाद भएको जनाएको छ ।

त्यस क्रममा विदेशमन्त्री रुबियोले भोटेकोशी बाढीपछिको विपद्को सामना गरिरहेको नेपाललाई आवश्यक सहयोग गर्न अमेरिका तयार रहेको बताएका थिए ।

उनले बाढीबाट भएको जनधनको क्षतिप्रति दुःख व्यक्त गरे । बाढीमा परी ज्यान गुमाएका नागरिकप्रति श्रद्धाञ्जली व्यक्त गर्दै रुबिओले समवेदना प्रकट गरेका छन् ।

कठिन परिस्थितिमा नेपाल सरकार र नेपाली जनताको साथमा अमेरिका रहेको उनको भनाइ थियो ।

जवाफमा लामिछानेले विपद्पछि उद्धार र राहतका लागि सरकारले आफ्नो सम्पूर्ण क्षमताका साथ काम गरिरहेको जानकारी गराएका थिए ।

प्रभावित क्षेत्रमा राज्यका संयन्त्र परिचालन गरेर उद्धार तथा राहत वितरणको काम अघि बढाइएको उनले बताए । त्यस क्रममा नेपालमा रहेका विदेशी नागरिकको सुरक्षाको विषय पनि उठेको थियो ।

लामिछानेले नेपाल भ्रमणमा आउने जुनसुकै देशका नागरिकको सुरक्षाका लागि नेपाल प्रतिबद्ध रहेको स्पष्ट गरे ।

बाढीपछि नेपालप्रति देखाएको चासो र सहयोगका लागि लामिछानेले अमेरिकी विदेशमन्त्री रुबिओलाई धन्यवाद दिए ।

यसैबीच नेपालस्थित अमेरिकी दूतावासले पनि विदेशमन्त्री रुबियो र रास्वपा सभापति लामिछानेबीच फोन संवाद भएको जनाएको छ ।

‘टेलिफोन संवादका क्रममा विदेशमन्त्री रुबिओले भोटेकोशी बाढीमा परी ज्यान गुमाएकाहरूप्रति गहिरो समवेदना व्यक्त गर्दै नेपालका जनता र सरकारप्रति ऐक्यबद्धता जनाउनुभयो’, दूतावासले भनेको छ, ‘ सभापति लामिछानेले नेपाल सरकारले जारी खोजी, उद्धार तथा राहत कार्यलाई सहयोग गर्न उपलब्ध सबै स्रोतसाधन परिचालन गरिरहेको जानकारी गराउनुभयो । कठिन परिस्थितिमा अमेरिकी सरकारले नेपाललाई गरेको सहयोगप्रति सभापति लामिछानेले धन्यवाद व्यक्त गर्नुभयो ।’